3-0 in kan chak - Stimac

India coach Igor Stimac chuan goal khat chiah khung mah se, 3-0 a chaka a inngaih thu a sawi. Croatian coach chuan, "Ka ngaihdanah chuan 1-0 ni loin, 3-0 zawk a ni," a ti a, Sunil-a goal khung an pawm lo leh penalty pek a ni lo chu match official lam tihsual a nih thu a sawi.

Stimac chuan sawi zawmin, "Ka player-te khan ti tura ka tih angin an ti vek a, an hnenah sawi belh tur ka nei lo. Goalkeeper Amrinder a khel ṭha takzet a, Sunil-a'n goal a khung lo kha a vanduai hle bawk.

"Goal khung châkin a tuihal reng a, vannei ni se hattrick siam thei hial a ni," tiin kum 38 mi a striker chu a fak a, midang zawng aia a inpekna a la thuk zawk thu a sawi lang zui.

Croatia coach hlui chuan, "ISL final zawha camp rawn thleng hmasa ber chu Sunil a ni a, hun khawhral loin a rawn kal nghal tawp mai a ni - hei hian ram tana a inpekna leh a tuihalna a hrilhfiah chiang viauin ka hria.

"Kan squad-ah chuan player fit ber a ni a, ni thum pawh a zawn zatin a khel thei ang chu," a ti a, a striker chu a fak hle.