Vanglaini Biangbiakna India-in VAR a mamawh lo - Joe Morrison

Indian Super League khelh zawh takah referee thutlukna tam takin sawisel a tawk nasa a, knockout match-a Kerala Blasters leh Bengaluru inkhelh ṭuma thil thleng phei chu tun thlengin sawi a la hlawh.

Bengaluru striker Sunil Chhetri-a'n freekick a pet thut avangin Bangalore club-in goal hmahruai an khung a, referee-in a pawmsak - a dik lohna a awm lo chungin Kerala Blasters player an lungawi lo a, an chhuak tau.

Kerala bakah coach Ivan Vukomanovic te chu hrem hmabakin an awm mek a, heng bakah hian referee thutlukna, fans lamin an duh khawp loh tam tak a thleng nual bawk. Heng thil thleng avang hian All India Football Federation (AIFF) president Kalyan Chaubey chuan ISL-ah video assistant referee (lite) hmang tura ruahmanna neih a nih thu a sawi a, fans tam takin an nghakhlel.

Hetihlai hian Indian football hrechiangtu leh rei tak lo inhnamhnawih tawhten India mamawh ber chu VAR a nih loh thu an sawi a, Vanglaini in a biaknaah football commentator lar Joe Morrison pawhin, "VAR hi India mamawh ber a ni lo," tiin a sawi.

VAR chu

AIFF president Kalyan Chaubey chuan Belgium-a an hman ang, a man tlawm zawk leh sum senso tlem zawk VAR hmang tura hmalak a nih thu a sawi a, "Belgium-ah chuan sum senso tlem zawkin VAR an kalpui a ni," a ti a, "Keini pawhin VAR (lite) kan kalpui dawn," a ti bawk.

Chaubey chuan, "ISL match ka en nual a, tihsual leh fans lawm lohna pawh ka hmu. Email bakah social media-ah message tam tak ka dawng a, fans tam takin VAR neih an duh a, a nih loh pawhin tihsual awm lo se an duh.

"Referee-te hian sum lamah harsatna an neih loh nan theihtawp chhuahin kan pui a, mahse, a tawpah chuan mihring ve tho an nihna hi a lo lang leh ṭhin a ni," a ti a, referee hna chu hna harsa tak a nih thu a sawi bawk.

Mahse, Chaubey chuan India tan theihtawp a chhuah zui tur thu sawi zuiin, "AIFF President ka nihna angin kan referee te lam ka ṭang a, an hnual leh hlim lai ber pawha an bula awm nih ka duh. India hian hmasawnna tur a nei a nih chuan ke a pen zel dawn a, Indian football-in hma a sawnna tur a nih chuan kut pawh ka dawh ang a, a ṭul chuan ruk pawh ka ru ang a, a puk pawh ka puk mai ang," a ti!

Mahse maw...

Chaubey-a thusawi avangin Indian football fans tam tak an phur a, mahse, an phur ang ngawt a ni lo ve thei tlat - ISL-a stadium hman mek 11 zinga 10 chu athletic tihna nena inṭawm a ni a, Mumbai City khelmual Mumbai Football Arena chu football chauh khelhna awmchhun a ni.

Hei vang hian VAR bungrua bun leh ruahman a hautak lehzual dawn tihna a ni a, inkhelh zawh apianga VAR senghawi zel a ngaih dawn avangin a hautak dawn - angle tin aṭanga la tur camera a ngai a, hei hi VAR (lite) ah chuan tihtlem theih a ni.

Match khata VAR hman manah hian cheng nuai nga aṭanga nuai ruk vel senso a ngai anga chhut a ni a, tuna ISL kalphungah hian match 117 khelh niin, VAR (lite) hi hman ni ta se, season khatah vaibelchhe sarih chuang sen a ngai dawn tihna a ni - season tharah I League champion Roundglass Punjab FC an awm belh dawn.

Vanglaini chuan AIFF general secretary Dr. Shaji Prabhakaran chu hemi chungchangah hian a pe pawp a, mahse, Dr. Shaji chuan hun danga sawi atana khek a duh thu Vanglaini a hrilh.

Morrison-a thukhawchang

Indian football-a hming langsar tam takin VAR an duh lo a, ISL commentator ṭhin Anant Tyagi chuan, "Buaina chinfel aiin buaina tam tak a hrin belh zawk ang," a ti a, VAR phenah chuan tisual ṭhin mihring tho an ṭhut tur thu a sawi.

Sports commentator lar Joe Morrison chuan, "Indian football hmasawnna tura in ngai a nih chuan, tuifinriata tui mal far khat ang chauh hi a hlutna chu a ni. India rama VAR hman hian World Cup a hruai thlen phah dawn lo che u," tiin Vanglaini a hrilh.

Joe Morrison hi Indian football ngainatu zingah chuan a mikhual lo. BBC sports reporter leh commentator lo ni tawh a ni a, Newcastle United tan pawh lo thawk tawhin, TEN Sports, TEN Action+, SONY SIX leh SSC-ah te a lo thawk tawh a, middle east leh Singapore-a Premier League tihlarna kawngah pawh a thawhhlawk hle.

Morrison chuan, "Indian football-in VAR aia a mamawh hmasak zawng zawng hi sawi dawn ila, hetia sawi mai tur chuan a tam lutuk a, hunin min daih lo a ni," tiin Vanglaini a hrilh a, India-in VAR mamawh lo a ti hle.

ISL & Lianzuala

Joe Morrison chuan ISL khelh zawh tak thlirlet zuiin, "Team parukin playoff an khel ta a, hei hian league hmuhnawmna a belhchhah a, boruak a tisang zual a ni," a ti a, league hmasawnna a nih thu Vanglaini a hrilh.

ISL-ah hian league round-a a sang paliin semifinal an khel ṭhin a, tun season-ah erawh league round-a parukna chinin playoff an khel - a sang pahnihin semifinal lut nghalin, pathumna aṭanga parukna ten knockout match khelin, semifinal khel tur an zawng ve leh a ni.

Vanglaini in Lianzuala chungchang a zawhna chhangin, "Chhangte hian ISL Golden Ball dawn hi a phu takzetin ka hria," a ti a, Lunglei tlangvalin ISL player ṭha ber nih a phu thu a sawi.

Tarlan tawh ṭhin angin Lianzuala hian ISL khelh zawh takah khan goal 10 khunga assist vawi ruk neiin, hero of the league-ah thlan a ni a, Indian player zingah Sunil Chhetri nen chiah he award hi an la dawng a ni.