India champion chu Lalmuanawma

Mizo badminton legend Lalmuanawma'n a kum tam deuh hnuah pawh Mizoram tan thil ropui a la ti zel a, Hlimen tlangval hian Yonex-Sunrise 45th Indian Masters (Veteran) National Badminton Championships-ah nomawi a chawi leh ta.

Mizoram Police Badminton Club tana khel Muanawma hian 40+ Men's Singles category final-ah nimin khan Antony Kattapurath Jacob chu 21-17, 22-20 in a hneh a, 40+ singles category-ah a vawi li nan national champion a ni.

Manohar Parrikar Indoor Stadium, Goa-a neih inelnaah hian seeded ni phak lo Muanawma hian semifinal-ah seeded no.2 Arup Baidya chu 21-16, 21-18 a hnehin final a invaw thleng a, nimin khan final a khel - final-a a hmachhawn Antony hi seeded no. 1 a ni a, mahse, Mizoram legend Muanawma hian a tawnhriat chhawr ṭangkaiin harsatna a tawk lo.

India champion Muanawma hi World Championship, South Korea-a neih turah India aiawh turin a invaw tling nghal a, 35+ Men's Singles category-ah pawh World Championship, Poland a khel turin a lo invaw tling tawh bawk.

Mizoram Badminton Association (MBA) chuan thuchhuah siamin, Mizoram tihmingṭhatu Muanawma an chhuan thu an sawi a, "World Championship a hmachhawn leh turah pawh duhsakna sang ber kan hlan a ni," an ti a, an duhsakna an hlan.