France mikhual tur Netherlands

FIFA World Cup final-a an vanduai aṭanga thla thum hnuah France-in zanin dar 1:15 hian Stade de France-ah Netherlands an mikhual dawn a, Euro 2024 khel tur an zawng dawn. Les Blues leh Oranje te group B-ah Greece, Republic of Ireland leh Gibraltar te nen an awm.

Group khat aṭangin team hnih an tling dawn a, team ṭha pahnih an inhmachhawn nghal dawn avangin inkhelh hmabak pawh a ngaihnawm sawt thei ang. Inelna reng rengah chak loa bul ṭan chuan a hnu lam a harsa ṭhin a, chuvangin team pahnih tan inkhel pawimawh a ni.

A danglam ta

FIFA World Cup kha nikum December thla chauh ni mah se team pahnih boruak a danglam nasa hle. Qatar zin tura koh Karim Benzema chu inhliam vangin a inlan thei lo a, a dam hnuah pawh koh kir a nih loh avangin Real Madrid forward hi a lungawi lo a, inelna zawh hnu lawkah ram tana inkhelh a chawlhsan thu a puang.

Les Bleus captain Hugo Lloris-a'n ram tana inkhelh a chawlhsan thu a puang a, veteran defender Raphael Varane pawhin a chawlh thu a puang bawk. Didier Deschamps chuan captain atan Antoine Griezmann en kanin kum naupang zawk Kylian Mbappe a thlang.

Khawthlang media te chuan Griezmann hi a lungawi lo a, team chhuahsan a tum hman hial niin an sawi. Atletico Madrid forward Griezmann hi Mbappe aiin kum riatin a upa zawk a, ram tan match 51-in a khel tam zawk. Chutihrualin Griezmann hi vice captain atan ruat a ni tho a, khelmual pawn lam boruak avang hian Mbappe nena an inkawp dan tur hi hmuh a châkawm sawt.

Coach thar Koeman

FIFA World Cup-ah khan Netherlands hian final thleng pha lo mah se an hneh loh Argentina an champion. Qatar-ah khan Louis van Gaal kaihhruaina hnuaiah an khel a, point sarih hmuin an group-ah pakhatna an ni.

Oranje hian quarterfinal an thleng a, penalty shootout-ah Argentina an hneh ta lo. Kum 71 mi Van Gaal-a'n World Cup zawhah coaching hna a chawlhsan a, a hmun ruak hi Ronald Koeman-a'n a rawn hnawh khat.

Kum 60 mi Koeman hi a inkhelh hun laiin player ropui a ni a, club enkawl kawngah pawh tawnhriat a nei ṭha. Europe club langsar tak tak Ajax, Benfica, Valencia, Southampton, Everton bakah Barcelona thlengin a enkawl tawh a, Netherlands pawh hi kum 2018-20 chhung khan a enkawl tawh bawk.

Engtin zel?

Stade De France-ah hian France hi match hnuhnung pangaah an tlawm tawh lo a, Netherlands an hmachhawn hnuhnung pathumah an tlawm tawh lo bawk. Chutihrualin Oranje hi khualmualah match hnuhnung pakuaah an tlawm tawh lo.

Les Bleus squad aṭangin hliam vangin Arsenal defender William Saliba leh Chelsea defender Wesley Fofana te an inhnudawk a, chutihrualin English club-a khel pahnih hian hmun pawimawh an chang pha ngai chuang lo. France tlarhnungah Lloris a awm tawh loh avangin Mike Maignan chu goalkeeper tura ngaih a ni.

Tlarhma lamah Olivier Giroud an la nei a, AC Milan striker hi Mbappe, Griezmann leh Kinglsey Coman ten an thlawp thei ang. Deschamps-a'n midfielder Eduardo Camavinga chu left back atana a koh thu a sawi a, chuvangin midfield-ah Aurelien Tchouameni leh Adrien Rabiot te inkawp tura ngaih an ni.

Netherlands lamah Frenkie de Jong leh Steven Bergwijn te hliam vangin an khel thei dawn lo. Chutihrualin Oranje hian Premier League-a hming langsar Wout Weghorst, Cody Gakpo leh Nathan Ake te an nei a, Les Bleus tan tawh an khirh ang.