Brighton CEO-in Caicedo an chelh chhan a sawifiah

January transfer-ah Arsenal-in Brighton & Hove Albion midfielder Moises Caicedo lakluh an tum a, Seagulls-in chhuahtir an phal lo. Brighton CEO Paul Barber-a'n Caicedo an chhuah loh chhan chu Premier League-a an chet ṭhat ber season hman an duh vang a nih thu a sawi.

Seagulls hian 2017–18 season aṭang khan Premier League an khel ṭan a, season hmasa paliah a sang 10 zingah an tel phak lo. Season liam ta khan Brighton hi pakuana an ni a, tun season-ah parsaihna an ni mek.

Brighton CEO hian Arsenal dilna hnawlin thutlukna huaisen a siam a, club-in an ṭhatpui tih a lang. Paul Barber chuan, "Season ṭantirha kan player ṭha ber zinga mi a ni a, league-ah dinhmun ṭha takah kan ding a, FA Cup khelh tur kan la neih bawk avangin inkhel pawimawh khelh tur kan la ngah.

"Chuvangin January-a Moises hralh kha thil tih chi a ni lo a, season chawhnu lamah pawh kan player pawimawh tur a ni. Kan player ṭhate kan chelh theih chuan Premier League-a kan thlensan ber ṭum kan tawng thei a, season tharah Europe inelnaa tel theihna kawng a inhawng bawk," tiin a sawi.

Kum 21 mi Moisés Caicedo hian kum 2021 khan Ecuadorian club Independiente del Valle aṭangin Brighton hi a zawm a, tun season Premier League match 25 an khelh tawhah match khatah chiah a la awl a ni.