India hnehtu Australia pakhatna

Australia chuan ODI match hnuhnung berah India chu 21 runs-in an hneh a, 2-1 in series an la. Aussies hian Men in Blue an hneh avangin ODI ranking-ah pakhatna an ni.

Nilaini khan MA Chidam-baram Stadium-ah ODI match thumna hi khelh a ni a, Australia-in bat hmasak an thlang. Mikhual team hian over 49-ah 269 runs an siam a, India-in over 49.1-ah 248 runs chauh an vaw chhuak.

Aussies nge nge

Australia opener Travis Head (33) leh Mitchell Marsh (47) te inkawpin 68 runs an siam hman a, Steve Smith-a'n run siam loin pavillion-ah kir mah se player dang zawngin run 10 an vaw tling vek.

Aussies batter zingah Marsh aia run siam tam an awm lo a, chutihrualin David Warner (23), Marnus Labuschangne (28), Alex Carey (38), Marcus Stonis (25) leh Sean Abbott (26) ten 20 runs an siam tling vek.

Mikhual team hi over 50 dam tling thei lo mah se over 49-ah 269 runs an siam avangin chak beiseina an neih phah a ni.

A tawp a zuih

India opener Rohit Sharma (30) leh Shubman Gill (37) te inkawpin 65 runs an siam pha a, Virat Kohli-a'n half century (54) rawn siamin KL Rahul (32) pawh a che chhe lo.

Men in Blue hi chak thei dinhmunah an ding a, chak tur zawka ngaih pawh an ni hman. Amaherawhchu India batter-te run siam hi a tam tawk lo a, Hardik Pandya (40) rawn che ṭha ve bawk mah se tailender-te mawhphurhna a sang ta hret.

Pressure sangah India tana a tawp lama bat tuten run tam an siam thei lo a, over 49.1-ah 248 runs an siam tihin an thi fai vek. Aussies bowler Aston Agar-a'n Kohli a vawm hlum chu result tidanglamtuah a ngaih theih a, Adam Zampa pawhin wicket pawimawh a la bawk.

Captain thukhawchang

India captain Rohit Sharma chuan, "Batter lamin kan tihtur kan titawk lo a, kha aia run tam zawk siam thei tur kan ni. ODI World Cup atan tun ṭuma kan inkhel hi a pawimawh pha lo a, chutihrualin inzir belhna tur ṭha tak a ni ang," tiin a sawi.

Australia captain Steve Smith chuan, "220 runs-ah kan tawp ṭep a, 269 runs kan thleng thei kha danglamna siamtu chu a ni. A tawp thlengin theihtawp kan chhuah a, result duhawm kan neih phah," tiin a sawi ve bawk.

ODI match thumnaah hian Adam Zampa chu player of the match-a thlan a ni a, Mitchell Marsh chu player of the series-a thlan a ni thung.