Saudi League hi a la ṭhang zel dawn - Ronaldo

Cristiano Ronaldo chuan Saudi Pro League a fak a, khawvel league ṭha zinga a la tel theih thu a sawi.

Kum 38 mi Ronaldo chuan, "Saudi Pro League-ah hian inelna ṭha tak a awm. Premier Leauge a tluk pha lo tih chu zep tur a awm lo. Mahse, he league hi ka beisei aiin a sang a, mak pawh ka ti. Tuna an ruahman anga an kalpui zel chuan kum ruk sarih hnuah chuan khawvel league ṭha panga zingah an tel pha thei hial ang," tiin a sawi.

Khawvel pum huap football league ranking-ah Saudi Pro League hi 66-naah an awm mek a, England-a league sang pathumna League One chungah a awm. Chutihrualin Premier League hnuai chiaha awm Championship pawh 26-na a la ni phak a, Saudi Pro League nen an inkar a la zau hle.