F1 hlutna a hniam phah lo - Toto Wolff

Mercedes F1 boss Toto Wolff chuan season dang angin kuminah inelna kaltluang lo deuh pawh ni se, intlansiak an nei tam thei lo ta deuh a nih pawhin a hlutna a nep phah chuang lo tih a sawi.

Season kal laiah Lewis Hamilton chuan a teammate Valtteri Bottas lakah point 30 zetin hma a hruai fal leh der tawh, a vawi sarih nan world champion a nih leh ngei pawh a rinawm hle. A tira an ruahman dan chuan kuminah hian intlansiak 22 awm tura tih a ni. Mahse Covid-19 vangin inelna a awm pangngai thei lo, nimin tlai thleng kha chuan intlansiak tur 13 chauh a la chiang – tlan kawng pakhata inelna vawi hnih neih chang pawh a awm.

Wolff chuan, "Eng championship pawh ni se season dang aia a hlut loh bikna a awm chuang lo, inelna a tlem avanga sawisel duh chuan intlansiak a hmachhawn hoah khan tih sual leh tih dik loh a nei tlem mai tur a ni," a ti. Car intlansiakna sang ber hi world championship pangngai nei tur chuan a tlem berah intlanisak pariat tal a awm a ngai. Kuminah hian calendar pangngai angin kal thei lo mah se championship erawh an neih tlang theih hmel ta hle.