'Khuh' lui tan red card a hmuh theih!

Football dan siamtu International Football Association Board (IFAB) chuan inkhelh laiin player zingah an khingpui player emaw match official lam hawi zawnga khuh lui an awm chuan red card an chawi tur thu an sawi - IFAB dan thar siam hi hman nghal tur a ni.

IFAB chuan player khuh lui te chu "ṭawngkam mawi lo, tih elna ṭawngkam leh chet dan mawi lo lantirna' huang chhungah dah theih an nih thu an sawi a, dan thar hi Covid-19 vanga dah belh an ni. Football dan siamtu pawl chuan, "Tihpalh liau liau emaw, player leh a khuh khum inkarah chuan zau tak hmun awl a awm a nih chuan referee chuan hremna a lekkawh lo ang. Mahse, hnai takah, huatawm taka ti a nih chuan referee-in a duh angin hremna a lek kawh thei ang," an ti!

Covid-19 vanga football a chawlh ṭhuap hma khan Atletico Madrid striker Diego Costa chu media ho hmaah fiamthuin a lo khuh der tawh a, hei hi Champions League quarterfinal lut tura Liverpool an hneh zawh hlim kha niin Covid-19 hlauhna a hluar tawh hle. 

Hetihlai hian Football Association chuan thuchhuah siam nghalin grassroots football ho tan dan thar chungchanga inkaihhruaina dan an puang a, "He dan tharah hian player chu red card hmuh kher a phu loa hriat a nih chuan infiamnaa nungchang mawi lo a lantir avangin yellow card pek tur a ni," an ti a, red card pek chu 'khuh' satliah ni loin midang tih el nana khuh lui ngei an nih tur thu an sawi tel. 

FA hian English Football League leh Premier League tan erawh he dan bikah hian inkaihhruaina dan dang a siam tawh chuang lo a, referee-in a duh angin thutlukna a siam thei dawn tihna a ni.