Ronaldo - 197 not out

Cristiano Ronaldo a la chuai lo a, Saudi Pro League-ah khel tawhin kum 38 mi ni tawh mah se goal khung a la thiam reng. Portugal chuan Ningani zan khan Euro qualifier-ah Liechtenstein 4-0 in an hneh a, Ronaldo-a'n goal hnih a khung.

Al Nassr forward Ronaldo hian ram tan goal 120 a khung a, ram tana goal a khung apiangin a record neihsa a belhchhah zel. Liechtenstein lakah Ronaldo-a'n ram tan vawi 197 a khel a, ram tana khel tam ber record Bader Al-Mutawa (Kuwait) siam chu a khum bawk.

Ronaldo-a'n chawlh mai a la tum lo a, Portugal coach thar Roberto Martinez-a'n a rin bawk avangin ram tan a la inlan zel a rinawm a, goal pawh a la khung zel ang.

Goal khat phawt

Portugal khingpui Liechtenstein hi FIFA ranking-ah 198-na an ni a, Martinez-a naute nen an inthiam hleih hret. Estádio José Alvalade, Lisbon-ah Portugal-in bul an ṭan ṭha a, goal pawh an khung hma.

Ṭan phat aṭangin Portugal an hmuhnawm nghal a, captain armband hrengtu Ronaldo-a'n Liechtenstein tlarhnung a rum ṭhaih nghal. Mualneitu an phur chhunzawm a, minute riatna lekah Joao Cancelo chuan box pawn aṭangin a volley lut.

Goal luh theih nan hian Ronaldo chuan a khawih kawi a, Portugal captain goal khungah chhiar sak se chuan hattrick a siam hial dawn tihna a ni.

Portugal-in nawr chhunzawm mah se first half-ah goal a luh belh tawh lo a; Joao Felix, Ronaldo leh Joao Palhinha te an vannei tawk lo.

Goal thum dang

Second half-ah Portugal-in goal an khung hma a, minute 47-naah Bruno Fernandes thawh ṭhat zarah Bernardo Silva-a'n an goal hnihna a khung.

Loan hmanga Man City aṭanga Bayern Munich zawmtu Cancelo-a'n penalty a hlawh chhuak zui a, Ronaldo rawn pen chhuakin minute 51-naah goal kilah tak a pet lut. Portugal captain-in a tih ṭhin dan pangngaiin goal khung a lawm a, mipuiin ring takin 'Siuuu' an lo tirual bawk.

Minute 63-naah Portugal-in box pawn chiahah freekick an hmu a, Ronaldo-a'n kawh zetin goal-ah a pet. Portugal captain ball pet hi goalkeeper zawn anga chhal theih ni mah se a kawh em avangin keeper Benjamin Buchel dem a harsa.

Minute 78-naah Ronaldo an la chhuak a, Goncalo Ramos a rawn lut. Ronaldo chhuah hnuah Portugal-in goal an khung tawh lo. Hriat tel atana ṭha chu, Martinez-a'n striker pahnih a hmang. Ronaldo leh Joao Felix te tlarhmaah an inkawp a, Portugal manager tharin Ronaldo ṭangkai theih dan turin game plan a duangah a ngaih theih.

Engtin zel?

Ronaldo hian kum 2004 khan Portugal tan a khel ṭan a, kum 20 chhung chu kum tinin ram tan goal a la khung ziah. Portugal captain hi a khel tam satliah lo a, football-a pawimawh ber goal a keng tel.

Portugal hian March 26, Pathianni zan hian Luxembourg an tlawh dawn a, Ronaldo-a'n record siam ṭhat nan a hmang thei ang. Manchester United forward hlui Ronaldo hian Luxembourg lakah hian goal kua ngawt a khung tawh a, a goal khung tamna ber ram a ni.

Martinez-a hote hi group J-ah an awm a, inkhel dangah Bosnia and Herzegovina-in Iceland 3-0 in an sawp. Slovakia leh Luxembourg te goal awm loin an inhnehtawk bawk.

Ronaldo leh 2023

Manchester United-in FIFA World Cup ṭan hmain Cristiano Ronaldo contract an titawp a, Portuguese forward hian club nei loin Qatar a pan.

Ronaldo hi World Cup-ah a che ṭha tawk lo a, coach Fernando Santos nen an inhmu thiam lo. Hemi a nih avang hian Ronaldo-a'n thlasik bazarah a duhthusam club a hmu lo a, sum ṭhahnem tak sen inhuam Saudi club Al-Nassr FC a zawm.

Portuguese forward Ronaldo hian thawm a nei ring nghal a, friendly match-ah Lionel Messi, Neymar leh Kylian Mbappe telna PSG hmachhawnin goal hnih a khung nghal.

Saudi Pro League leh Super Cup semifinal-ah erawh Ronaldo a che ṭha tawk lo a, minute 180 chhung goal a khung lo. Ronaldo theihna erawh thup bo reng theih a ni lo.

Kum 38 mi Ronaldo-a'n Al-Nassr tan hattrick vawi hnih a siam tawh a, match 10 aṭangin goal kua a khung. Portugal coach thar Roberto Martinez tan pawh en kan theih a ni lo a, Saudi Pro League-ah khel mah se Ronaldo chu Portugal captain atan a thlang. Ronaldo pawhin amah ringtu a tithlawn lo a, goal hnih a khungsak.