Goal 800 khung thei Lionel Messi

World Cup champion an nih avangin an lawm a, football inelna boruak lian leh ropui bera an champion hnuah Argentina chuan match an khel ve leh ta a, an hlim boruak tisang zual turin Lionel Messi chuan mellung pawimawh a phun.

Nimin zing khan Messi-a'n Panama lakah freekick a chhuih lut a, club leh ram tana goal a khung zat chu 800 a tling ta. Messi leh Cristiano Ronaldo te chauh hi goal 800 khung tling thei an ni - an ropui vet vet hle.

Kum 35 mi Messi hian Barcelona tan goal 672 a khung a, chumi hnuah Paris Saint Germain tan goal 29 a khung leh tawh. Argentina tan goal 99 a khung tawh, heng zingah hian World Cup final-a goal hnih kha a tel.

Buenos Aires khawpuia khelmual pakhat Monumental de Nunez Stadium-ah a vannei zual 83,000 ten ticket an chang a, lut thei ve lo mah se a brouak tem turin kawtthlerah mi ṭhahnem tak an pungkhawm bawk - wold champion nih hnua match hmasa a ni bawk a, boruak a nung hle.

Coach Lionel Scaloni-a'n World Cup final an khelh ṭuma bul ṭantu player 11 bawk kha a tirah a luhtir. Qatar ramah khan France hnehin an champion a nih kha, football atchilh ram an ni bawk a, an tan chuan a aia thil duhawm a awm thei tawh chuang lo.

Inkhelh hmain hnam hla an play a, player leh fans tam tak mittui a luang - a boruak tur chu kan hriatthiampui phak a ni lo ang. Panama lakah Thiago Almada-a'n goal hmahruai a khung a, hun tawp dawnah Messi hian a belhchhah.

Ram tan Messi-a'n goal 99 a khung tling ta chiah. Argentina hian Thawhlehniah Curucao nen friendly match an khel leh dawn, goal 100 khung tlin theihna remchang a ni a, amah hnaih bertu Gabriel Batistuta (56 goals) nen an inkar a zau ta hle.