Nagelsmann - Out, Tuchel - In

Bayern Munich chuan an manager Julian Nagelsmann an ban dawn a, a thlak tura an sawi chu Chelsea manager hlui Thomas Tuchel a ni. He thuziah lai hian club-in thuchhuah an la siam lo a, chutihrualin football thuthang hre thei bik journalist Fabrizio Romano chuan 100%-a a chian thu a sawi.

Bavarians hian inelna lian pathumah champion beiseina sang tak an la nei vek a, DFL-Supercup-ah an chak tawh bawk. A tawi zawng chuan treble champion thei an la ni.

Europe-a inelna sang ber Champions League-ah quarterfinal thleng turin Lionel Messi, Neymar leh Kylian Mbappe telna Paris Saint-Germain meuh hneh mah se Nagelsmann tan a tawk lo.

Bayern-in Nagelsmann an ban chhan ber nia lang chu Bundesliga an thunun thei lo hi a ni a, an match hnuhnung bera Bayer Leverkusen an hneh loh avangin pahnihnaah an awm mek. Hei bakah hian coach ṭha Thomas Tuchel-a'n club a nei lo a, club thuneitu tan thutlukna siam a awlsam phah ang.

Khawthlang media-te ziah danin club thuneitute thutlukna hi Nagelsmann-a'n mak a ti takzet. Portugal defender Joao Cancelo chuan, "Munich-a ka let hunah Nagelsmann a awm dawn lo tih ka hre ve chiah. Amah hi Bayern-a min latu a ni a, ka lawm takzet. Tuchel erawh amah vangin UCL nomawi ka chân a, kuminah kan lak dun ngei ka beisei," tiin a sawi.

German manager Tuchel hian UCL 2020 final-ah PSG thlenpui mah se Bayern lakah a vanduai a, January 2021-ah Chelsea zawmin London club hi UCL-ah a champion pui nghal. Borussia Dortmund manager hlui Tuchel hian UCL nomawi chawi leh theihna hun remchang a nei a, Bayern a enkawl hmasak berah a club hlui Dortmund chu Allianz Arena-ah a hmachhawn ang.