Record siamtu Kane; Italy ngamtu England

Harry Kane-a'n record thar a siam leh ta - Ningani zan khan Euro 2024 qualifier-ah England chuan 2-1 in Italy an hneh a, penalty hmanga goal khungtu Harry Kane chuan England tana goal khung hnem ber record thar a siam.

Kane hian ram tan goal 54 a khung tling ta chiah a, Three Lions tana goal khung hnem ber ni reng ṭhin Wayne Rooney (53 goals) chu a tlanpel - English striker hian goal 54 khung tur hian match 81 bak a mamawh lo!

Naples khawpuia inkhelah hian England tan Declan Rice chuan minute 13-na lekah goal hmahruai a khung a, minute 44-naah Kane hian penalty hmangin a belhchhah - Italy tan Mateo Retegui chuan khung ve mah se a team erawh a chhanhim zo ta chuang lo a ni.

England left back Luke Shaw chu minute 80-naah hnawhchhuah ni mah se, Azzurri tan a tam zawk nih chhawrna hun a awm tawh lo - England-in khualmualah 2-1 in hnehna an chang a, kum 1961 hnua khualmuala Italy an hneh hmasak ber a ni hial. Three Lions hian Pathianni zan dar 9:30-ah Ukraine an mikhual zui dawn a, Italy hian Pathianni zan dar 12:15-ah Malta an lenchilh thung ang.

England an pawr

Italy-in England hneh ngei an duh a, Three Lions mikhual nan pawh tun hnaia Serie A-a che ṭha tak, champion ngei tura ngaih Napoli khelmual Diego Armando Maradona Stadium an thlang - mahse, Napoli fan-ten international football aiin league an nghakhlel zawk a, an thawm a ṭha tawk lo.

Inkhel ṭan aṭanga minute 13-na lekah Three Lions-in goal hmahruai an khung a, Harry Kane-a shot chu Italy defender ten lo dang mah se a per lehlam chu Declan Rice ke bulah tak a tla a, West Ham midfielder hian a khung.

England tan midfield-ah Jude Bellingham leh Rice te an khel ṭha takzet a, mahni muala khel Italy an chet hleihtheih loh avangin beisei angin inkhel a hmuhnawm tawk lo.

Minute 44-na a ni a, England bawk an inlar nawn - Kane chuan an penalty hlawhchhuah chu goal-ah a chantir a, Paris St-Germain keeper ṭha Gianluigi Donnarumma chu chiang taka bumin, Three Lions tana goal khung hnem ber record thar a siam.

A hming Retegui

England-in first half an thunun tluan chhuak zak tiin a sawi theih a, Manchester City forward Jack Grealish-a'n a hun ṭha neih chhawr ngat phei se chu Three Lions hi 3-0 a hma hruai thei an ni hial.

Chawlhlawkah erawh Italy-in thu ṭha an ngaithla niin a lang a, an insiamṭha - mipui thawm pawh a ring sawt a, minute 56-naah Azzurri hian goal an rawn khung ve ta nge nge.

Manchester United defender Harry Maguire-a tihsual zar zoin Mateo Retegui chuan chak taka ball lalutin, an si phurh sutna goal hi a khung a, ram tana a inlan hmasak berah goal a khung nghal.

Kum 23 mi Retegui hi Argentina mi leh sa, Italian thisen kai a ni a, age level-ah Argentina tan inlan mah se Roberto Mancini-a'n Italy tana inlan turin rin loh takin a ko a, Argentine club Tigre tana khel forward hian a match hmasa berah goal a khung zui.

England an ṭang

Italy-in goal an khung hnuah an phur thar a, chutihrual chuan he team insiamrem mek hi Three Lions tana harsatna tam zawk thlen turin an ṭha tawk lo - European champion hian Euro 2024 khel turin insiamṭhat an mamawh.

England tan minute 80-naah thil pawi a thleng a, United left back Luke Shaw chu hnawhchhuah a ni - Shaw hi a yellow card pahnihna a hmuh avanga hnawhchhuah a ni a, fimkhur deuh se, yellow card pahnih hi pumpelh thei a ni.

Kum 27 mi Shaw-a yellow card hmasa zawk hi a hun khawhral vanga pek a ni a, minute hnih hnu lawkah Retegui laka a chet dan avangin a yellow card pahnihna a hmu zui.

England leh Shaw vanneihna erawh hliam vanga inlan thei lo striker Ciro Immobile tel lohna Italy tlarhma a hriam tawk lo a, Azzurri-in mahni mualah a tam zawk nih an chhawr thei lo.

Kane leh record thar

England striker chhuanvawr Harry Kane-a'n ram tana a goal 54-na a khung a, England tana goal khung hnem ber a ni nghal - a ropui lai chu goal 54 khung tura match 81 chauh a mamawh hi a ni a, a lehpel tak Wayne Rooney khan goal 53 khung turin match 120 a mamawh.

Kane chuan, "Ka tan chuan engkim a ni ber e. England kawr ha chunga khelmuala lut a, nakkum Euro khelh tuma ka inpuahchah leh thei ta hi ka lawm hle.

"Penalty hmangin goal ka khung a, goal net a tawn puar chiah kha chuan hlim tak a ni - hun danglam bik a ni," a ti a, ram tana a inlan thei leh record a siam thei chu a lawm thu a sawi.

Tottenham Hotspur striker Kane hian ram tana goal a khung 54 zinga 52 chu box chhung aṭanga a khung a ni a, goal hnih chiah hi box pawn aṭanga a khung a ni - a ke dinglam hmangin vawi 39 a khung a, a lu hmanga vawi kua tauh lutin, a ke veilam hmangin vawi ruk a khung bawk.

Kum 2015 aṭanga England tana goal khung hnem ber lo ni reng tawh Rooney chu Kane lawmpuitu hmasa a ni a, United legend chuan, "England tana goal khung hnem ber a nih avangin Harry Kane ka lawmpui hle.

"He record siam tur hian hun rei a nghah ka ring lo sa a, mahse, ka beisei aia rangin record hi a rawn siam a ni. Pa ropui tak, awihawm loh khawpa goal khung thei leh England legend a ni e," tiin a record khumtu chu a fak.

Kane chuan, "Wayne-a'n ram tana goal khung hnem ber record a siam khan a tana a hlutzia ka hria a, ka chhuang em em bawk. Record a siam khan a lawmpui nan boot ka pe a, mahse, engtik niah emaw chuan min pek let tur thu a sawi. Mi danglam bik a ni e," a ti a, Rooney a fak let.