Kane-a record bihchianna

Harry Kane chu ram tan match 1.5 dan zela goal khung ang a ni a, a record a khum tak Rooney kha ram tan match 2.26 dan zela goal khung ang a ni - English player parukin international football-ah goal 40 an khung tawh a, Kane leh Rooney bakah Sir Bobby Charlton (49), Gary Lineker (48), Jimmy Greaves (44) leh Michael Owen (40) te chu international football-a goal 40 khung tling an ni.

Greaves hian ram tan match 1.3 dan zela goal khung ang a ni a, ani hi goal khung tura match mamawh tlem lama Kane-a'n English player zinga a tluk loh awmchhun a ni.

March 2021 hnuah khan Kane hian ram tan match 28 khelin goal 22 a khung a, November, 2022 khan San Marino laka 4-0 a an chak ṭumin goal li a khung - kum 28 liam taa San Marino lakah vek Ian Wright-a'n goal li a khung hnua ti leh thei hmasa ber a ni.

World Cup 2022 quar-terfinal-ah khan France laka penalty chhuih lutin, England tana goal khung hnem lamah Wayne Rooney a tluk chiah. He inkhelah vek hian Rooney khumna chance nei mah se a penalty pahnihna erawh a chhuih lut ta lo.

Kum 2021 khan Kane hian ram tan goal 16 khungin, England tana kum khata goal khung hnem ber record a lo siam tawh a, kum 1927-a goal 12 khungtu Dixie Dean leh kum 1908-a goal 12 khungtu George Hilsdon a khum.

Kane-a goal khung tam zawk hi Gareth Southgate-a enkawlna hnuaia a khung a ni a, Southgate-a hnuaiah hian match 64 khelin goal 49 a khung a, qualifier match 28-ah goal 33 khungin, World Cup vawi hnih leh European Championship (3) a hruai thleng.

Spurs striker hian October 2017 - September 2021 inkar khan qualifier match 15-ah a zawnin goal a khung a, major tournament-a a goal khung pawh a nep lo hle. European Championship match 11-a goal li a khung hi a tam tawk lo kan ti a nih pawhin, World Cup match 11 aṭanga goal 11 a khung erawh sawi nep theih a ni lo.

Kane hi Gary Lineker nen English player zinga World Cup-a golden boot dawng thei awmchhun an ni a, Lineker hian Mexico 1986-ah khan dawngin, Kane hian Russia 2018-ah khan a dawng. Alan Shearer chuan Euro 96-ah khan dawng vein, ani hi major tournament-a top scorer ni thei dang awmchhun a ni.

Season thara Totten-ham Hotspur chhuahsan tur anga sawi Kane hian ram tan competitive match 68 khelin goal 48 a khung a, friendly match-a a khung a tlem zawk tihna a ni.