Barcelona president Joan Laporta

European football-a thuneitu sang ber UEFA chuan tun hnaia thamna sum avanga thubuai siamsak Barcelona chu a chhui chiang dawn a, Catalan club puhna zirchiang turin ethics & disciplinary inspector an ruat a ni.

Barcelona hi Spain rama referee committee vice president hlui Jose Maria Enriquez Negreira hnena euro maktaduai 8.4 pea puh an ni a, tun thlatir khan Barcelona-a court pakhat chuan Barca hi thamna sum hmang, mi rinna tichhetu leh dik lo taka thil tiah an puh a, Barca lam hian an pha nasa hle.

Mahse, dan hremite chuan Barca hi Negreira leh a company Dasnil 95 hnena sum peah an puh a, an sum pek hi kum 2001 leh 2018 inkara an pek a ni.

UEFA chuan, "Barcelona-in UEFA dan an bawhchhia anga sawi awm chungchangah, UEFA chuan zirchian ṭulin a hria a, hemi zirchiang tur hian Ethics & disciplinary inspector ruat an ni," tiin Catalan club an chhuichian tur thu an sawi.

Barcelona-in thamna sum an chelek chungchang hi radio station Ser Catalunya chuan an puang hmasa ber a, hei hi chhiah lama thuneituten Dasnil 95 an chhuichianna aṭanga lo irh chhuak a ni.

Sorkar lama dan hremite chuan Barcelona hian tihsual an nei ngei niin an sawi, "Barca hian Jose Maria Enriquez Negreira nen hian a rukin ṭawngkaa inremna an nei a, ani hian technical arbitral committee (CTA) a nihna chu chhawr ṭangkaia sum lain, Barca tana ṭha tura referee-ten thutlukna an siam ṭhin theih nan hma a la a ni," an ti.

Barca chuan an sum pek hi pha lo mah se, an pek chhana puhna erawh an pha a, "Coaching staff-ten video an mamawhte lakkhawm nan hman a ni," an ti a, Negreira chu technical thila dawr chauh an nih thu an sawi.

La Liga hmahruai mektu Barcelona leh Negreria bakah hian Barcelona president hlui Josep Maria Bartomeu leh Sandro Rosell te chu thamna sum chungchangah hian dik lo taka cheah puh an ni bawk a, La Liga chief executive Javier Tebas chuan Barcelona president Joan Laporta chu an thil lo tihtawh chu a sawifiah thei lo a nih chuan a nihna bansan turin a ti bawk.

Real Madrid chuan dan hremite hmalakna chu an thlawp thu sawiin, "He thil tihin a nghawngte tana dinchhuahna hun siam a nih hunah, kan dikna chanvo hlen turin kan ding ve ang," an ti a, Barca chhan an tum lo.