MotoGP Pathianni zanah an tlan ṭan leh dawn ta
Bike intlansiakna sang ber MotoGP chu season thar an ṭan dawn. Pathianni zan dar 6:30 hian Algarev International Circuit-ah Portuguese Grand Prix an tlan dawn, intlansiak hmasa ber aṭangin a hmuhnawm nghal ang.
Champion lai Francesco Bagnaia chuan Ducati bike khalh chungin a nomawi humhim a tum dawn. Hun rei tak an chet fuh hleihtheih loh hnuah Repsol Honda chuan Marc Marquez hoin an inlan thei dawn bawk.
Dan thar
Tun season hian an kalhmang thlak hret an nei, intlansiak vawi hnih zel a awm dawn! A hma chuan qualifying bak chu intlansiak vawi khata an point hmuh kha an ring tlang nghal mai ṭhin - kuminah erawh Inrinniah a chanve an tlan dawn.
'Sprint Race' tiin a hming an vuah a, inelna tak neih hma niin an intlansiak pangngaia an tlan tur chanve (50%) a thui an tlan dawn. Hetah hian pakhatna aṭanga pakuana ten point (12–9–7–6–5–4–3–2–1) an hmu ang.
Pathianniah intlansiak pangngai an nei chhunzawm leh dawn tho a, hetah erawh an tih ṭhin dangin lap an tlan kim vek tawh thung ang, kum dang nen an point hmuh zat chu a inang dawn - ni hmasa nena belhkhawm chuan a tam zawk tawh ang.
Inrinnia tlan tur 'Sprint Race' a hnehna changte hi Grand Prix a chak angin chhiar an ni dawn lo, an statistics lamah chuan 'Sprint race wins' tih an ni ang. Grand Prix zawng zawngah awm tura ruahman a ni - intlansak hi hmun 21 zetah neih tura ruahman a ni.
Honda leh Marquez
Marc Marquez chuan a season 11 nan Repsol Honda bike a khalh dawn, season thar inbuatsaihna lamah Honda hi che ṭha tawk lo mah se, dam ṭha ver vawra a inlan theih dawn avangin Marquez a zam lo, sulhnu ṭha hnutchhiah theih a inring.
Spanish rider chuan, "Kei leh Honda thil tum chu kum 2013 aṭang khan a la pangngai reng, chu chu a ṭha ber nih a ni. Honda chungah rinna ka nghat pumhlum a, ruahmanna leh hmalakna kal mek te chu ka thlawp vek.
"Kan elpui team dangte hian nasa takin hma an sawn a, umphak an harsa dawn tih pawh ka hria. Keini pawh midang tana umphak harsa turin chet kan tum ang," a ti a, an elpui tur Ducati chu team ṭha bik an nih thu a sawi tel bawk.
MotoGP vawi ruk champion tawh hi Joan Mir nen an inkawp dawn. Mir hian tun hmain Suzuki bike khalh chungin nomawi a lo chawi tawh, kuminah Marquez nena Honda bike an khalh dun tur hi khawvel hmuh chak a ni.
India ramah
Tun hmain India hian Formula 1 chu a thleng tawh, mahse an chhunzawm thei lo. Kumin September thla tawp lamah hian MotoGP a thleng dawn. Buddh International Circuit (BIC)-ah tlan a ni ang - Mizo tan a hmuna en theihna remchang a ni dawn.
MotoGP champion lai Francesco Bagnaia chuan, "Tun hmain India ramah ka la intlansiak ngai lo, a hma chuan Mahindra siam chhuah bike ka lo khalh tawh, kha tih hunlai khan India ram pan theihna remchan chu ka lo nei tawh, mahse ka zin lo.
"Ka tan chuan India rama intlansiak chu thil thar a ni dawn a, a tlankawng hmuh pawh ka chak tawh," tiin a sawi. India rama intlansiak an neih hmain inelna 13 an nei hman dawn, season danga thil thleng tawh chhut in India hi a boruak lai tak a ni thei dawn.
Bagnaia chuan tun season atana an elpui ber tura a ngaih chu 2021 world champion Fabio Quartararo leh Marquez te an ni. Vanlentino Rossi awm tawh lo mah se rider chhuak thar ṭha tak takte hian inelna hmuhnawm bik an chhawpchhuah ngei a rinawm.