Russia hremna an hlip

Damdawi hman phal loh hman chungchanga an buainaah World Athletics Council chuan Russia a ti zalen ta a, mahse Ukraine nena an indo buaina avanga hremna erawh kaltlangpui zel a la ni rih dawn.

Russian infiammite hian an ram sorkar hriatpuina ngeiin dan an bawhchhia a, damdawi hman phal loh an hman pawh thupsak an ni. Mahse, he thil hi hriatchhuah a nih hnuah na takin an hrem.

Kum 2015 November thla aṭang khan an ram hmingin Athletics huangah an a inlan leh thei lo, hun rei tak chhung hrem an nih hnuah an zalen veh leh tur hi Russian infiammi tan chuan chanchin lawmawm bik a ni ang.

World Athletics president Sebastian Coe chuan, "Russian Athletics Federation lamin an tih tur an ti thei a, kan duh dan anga an kal theih avangin hremna a tawp thei tawh a ni.

"Mahse, indo avanga buaina erawh a tuartu an tam a, infiammi tam takin nunna an chan phah bawk. Tun dinhmunah chuan an chunga hremna kan lekkawh hi remna leh muanna a awm theih nana kan tih a ni," tiin a sawi.