Brazil captain Casemiro

Brazil chuan Pathianni zing dar 3:30 hian Grand Stade de Tanger-ah Morocco an tlawh dawn a, coach lailawk Ramon Menezes chuan captain turin Casemiro a thlang.

Nikuma FIFA World Cup khelh zawh takah khan Brazil hi champion rinkai ni mah se quarterfinal-ah Croatia chu penalty shootout-ah 4-2 in an hneh lo. Inelna neih zawhah Selecao coach Tite-a a hna aṭangin a bang.

Brazil-in coach nghet an la nei lo a, Ramon Menezes chu coach lailawk turin an ruat. Kum 50 mi Menezes hi Brazil Under 20 enkawltu kha a ni a, South American U-20 Championship-ah khan an ram a champion pui.

Chutihrualin Brazil coach atan Real Madrid boss Carlo Ancelotti an sawi zawm a, player ṭawngkam aṭanga thlirin Italian manager hi coach atan an awt.

Real Madrid forward Rodrygo chuan, "Fiamthuin Brazil-in Ancelotti kan nghah thu kan hrilh a, ani pawhin fiamthu thoin Militao leh Vini te nen thutlukna kan siam ho tur thu a sawi," tiin an ram enkawl tura a duh thu a sawi.

Vinicius Jr pawhin, "Carlo Ancelotti hi coach hrawn tawha ṭha ber a ni," tiin a fak. Man City goalkeeper Ederson chuan, "Casemiro, Vini Jr, Militao leh player dangte nen kan sawi ho. Real Madrid hi UCL-ah kan hneh ang a, Ancelotti-a hian a rang thei ang berin Brazil a rawn pan thei ang," tiin a sawi ve bawk.