Jazz ngam loh Lakers

Nimin zing NBA regular season inkhelah Los Angeles Lakers chuan Utah Jazz 116-108 a hnehin Western Conference hmahruaitu an nihna an nemnghet a, playoff khel turin an tling chiang tawh bawk.

Lakers tan hian Anthony Davis-a'n point 42 zet a nei a, rebound vawi 12 a lak bawk avangin hnehna an chan theih nan a thawhhlawk hle. Le Bron James pawhin point 22 a neih bakah assist vawi kua nei bawkin a ṭangkai hle.

Tun hnai kum 10 chhunga a vawi khat nan Lakers hi a chung berah an awm a, playoff an khelh hunah pariatna nen an inhmachhawn ang – team nem zawk an tum dawn avangin tlang turin an dinhmun a ṭha tihna a ni.

Davis chuan, "Hun rei tak hnuah hetiang dinhmun hi kan thleng leh a ni a, team chhunga mi zawng zawng tan mellung pawimawh tak a ni chiang hle. Kan thlen chinah kan lawm a, chutihrualin a tawpna tur erawh a la ni lo," tiin hmabak an la ngah thu a sawi bawk.

Inkharkhip hnua an match neih tawh hoah Lakers hian Los Angeles Clippers, Toronto Raptors leh Jazz te an hmachhawn leh tawh a, Ningani zing dar 4:00-ah Oklahoma City Thunder nen an khel zui leh ang. Inkhel dangah Denver Nuggets chuan overtime an khelh hnuah Oklahoma City Thunder 121-113 in an hneh a, Toronto Raptors pawhin Miami Heat lakah 107-103 in hnehna an lo chang ve bawk. Eastern Conference pangana dinhmun luah turin Indiana Pacers chuan Washington Wizards 111-100 in an hneh. New Orleans Pelicans pawh Memphis Grizzlies lakah 109-99 in an chak a ni.