Manchester United kawr ha tur Jadon Sancho? United No. 7 - Cantona, Beckham, Ronaldo & Sancho

Borussia Dortmund chuan Manchester United tan hun tiam an siamsak - Jadon Sancho an lalut duh a nih chuan August 10 hmain an tih fel a ngai dawn. English winger hi Ole Gunnar Solsjkaer-a duh ber a ni a, out and out winger hi United mamawh tak a nih bawk avangin tun nipui transfer-a chanchin ngaihnawm ber a tling.

German club hian kum 20 mi England winger manah hian pound maktaduai 100 chuang an chhiar a, tun thlengin inremna an nei lo. Thuthang erawh a tam a, Manchester United hian Sancho an lakluh ngei a 

rinawm hle.

Manchester City aṭanga inzir chhuak Jadon Sancho hian August 2017 khan Borussia Dortmund a zawm a, Pep Guardiola duhlai ni mah se Spanish manager hian khelhna hun a tiam theih loh avangin Sancho-a'n German club 

a zawm.

English player tam tak Premier League-a an lungawi laiin Sancho erawhin chona thar a hmachhawn a, fak a hlawh hle. India rama FIFA Under 17-ah khan Sancho hi England player langsar ber tiha sawi theih a ni a, amaherawhchu Dortmund-in an koh let avangin a tawp a thleng lo - best player-a thlan Phil Foden a vanneih phah!

Sancho hian Bundesliga-ah season thum a inlan tawh a, match 78-ah goal 30 a khung. Season hman zawh takah khan league-ah goal 17 a khung a, assists vawi 16 zet a nei bawk. German club-in pound maktaduai 100 an chhiar tling hi a mak lo.

Borussia Dortmund pawisa phut zat erawh Covid-19 buaina avangin Manchester United tan pawh thehchhuah mai a awlsam lo. Chutihrualin club pahnih bakah Sancho thlengin transfer hi a thlen theih an beisei vek.

Nimin tlai thuthang awm danah chuan United leh Sancho hi mimal contract chungchangah an inrem a, English winger hian kum nga chhung atan contract an ziak ang a, kum khatah euro maktaduai 17.6 a hlawh ang. Hei hi a dik a nih chuan Sancho hian kar khatah €338,461 a hlawh dawn tihna a ni.

United leh Dortmund hian Sancho man pek dan turah inremna neih tumin an indawr mek a, English club hian Dortmund phut zat hi an inhuam tiha sawi a awm. Amaherawhchu a pek dan hmang hi club pahnih la inrem lohna niin a lang a, United hian a hlawma pe loin installment leh chet ṭhat dana zira pek tlak an duh. Tunkar chhungin inremna a awm hman beisei a ni.

United legend George Best-a'n jersey no. 7 a ha lar tawh a, Premier League awm hnuah erawh jersey no. 7 hming thanpuitute chu Eric Cantona, David Beckham leh Cristiano Ronaldo te an ni. Chutihrualin Antonio Valencia, Michael Owen, Angel Di Maria, Memphis Depay leh Alexis Sanchez ten number 7 hlutna an tih san belh theih lo. Tun dinhmuna jersey no. 7 ha tu chu Sanchez a ni a, Sancho hmun kianin Inter Milan lamah a kal dawn.

Jadon Sancho hian Borussia Dortmund-a a jersey no. hak ṭhin 7 ngei hi a rawn hak a rinawm a, United ṭantuten lawm takin an pawm ang. Kum 20 mi Sancho hian England-ah hmun pawimawh a chang tawh a, mual sira a chevel hmuhnawm tak chuan David Beckham aiin Cristiano Ronaldo a hnaih zawk mah se Portuguese forward nen huang khata dah a rem chuang lo.

Sancho hi United tlarhmaah Marcus Rashford, Anthony Martial leh Mason Greenwood te nen awlsam takin an inkawp rem a rinawm a, midfield aṭanga Bruno Fernandes leh Paul Pogba ten an chawm dawn bawk nen Covid-19 buaina karah United ṭantuten nipui transfer hlimawm tak an hmang mek.