Khatla TBL an che fuh hmasa Chak tlang nghal an tum dawn
An danglamna chu tlemte chauh a ni ṭhin, basket vawi khat neih a hlut em em laiin, hlah palh erawh a pawi thui ṭhin thung - Mizoram Super League season 8 Finals Game 1-ah Khatla TBL chuan Zarkawt BCA 76-73 in an hneh.
Hun tawp dawna Vanlal-ṭhazuala 3-points chu team pahnih daidangtu a ni a, an inhnaih vet vet hle. Thawhlehni zanah game 2 an khel chhunzawm leh dawn, tualchhung baksetball ngaina tute tan chuan 'Dream Final' a ni chiang.
MSL8 Finals hi best of three series hmanga chak zawk zawn a ni dawn - match hmasa bera chak lo Zarkawt BCA tan champion turin kawng a la inhawng. A che fuh hmasa zawk TBL manager H. Lalhruaitluanga chuan chak tlang an tum thu Vanglaini a hrilh.
A hmuhnawm
Lalrina Renthlei, Matthew Remtluanga Sailo, Zonunsanga, Joseph Allen leh Reuben Lalsangkima ten BCA tan inkhel bul an ṭan a, bench aṭanga lut pawh India tana khel tawh H. Laldinsanga (Mapuia) a ni a, an squad a chhah ṭha hle.
Khatla TBL an nep bik lo - India camp zawm tura kohna dawng tawh Vanlalṭhazuala, Michael Liansanga, Eddie Zaithanmawia, Lalliansanga leh Joshua Keys hoin an inlan, a bul ṭantu player panga an neih dan thlirin team ṭha zawk sawi theih an ni lo.
Zirtawpni zan R. Dengṭhuama Indoor Stadium, Mualpuia inkhelah BCA lamin ball kang an chang fuh hmasa, mahse an shot hmasa ber an hlah. Khatla TBL lamin basket an nei hmasa a, a hmawr bawktu pawh Ṭhazuala niin a team a chak pui.
TBL tan a tir lamah Reuben-a kut a kal, boruak sangah Ṭhazuala leh Eddie an buai lo a, ram pawn aṭanga an chah luh Keys kha hun tawp dawna Ṭhazuala basket neih tur siamsaktu a ni, a thutlukna kha a fuh takzet.
Keys hian ball a chang a, an khingpui player lamin an hual vel. Hun tawp nan minute khat pawh a awm tling tawh si lo, team pahnih hi 73-73 in an inhnehtawk mek. American tlangval hian Ṭhazuala hnenah ball a pe, a ni hian thutlukna huaisen siamin 3-points a shot a, a hlawhtling zui.
Game 2 an thlir
Khatla TBL manager H. Lalhruai-tluanga chuan, "A nihna takah chuan boruak a sang tawh si a, hun ṭhenkhat laiah chuan kan thil zir ang pawh a hman hleihtheih loh chang a awm, chutiang hunah tak chuan kan nauten huaisen takin an khel.
"Point kan score tamna match chu a ni lo ngei mai, mahse keimahni basket lam kan venghim ṭha viau, kan khelh danah kan lung a awi. Nikumah match hmasa bera an chak loh hnuah BCA an tho chhuak a, kuminah chuan thlen nawn tir kan tum lo," a ti.
Khatla TBL tan nomawi a hnai, chutih rualin Zarkawt BCA chu chuti maia tlawm ngawt chi an ni lo - a zawna vawi nga champion tum an ni. Lalrina Renthlei-in point 28 zet nei mah se nidang a phak lo deuh a, 3-points a hlah kha an ui vawng vawng ang.
Zonuna'n semifinal aṭangin beisei a la phak lo, lak chhuah a ngai zui. Mapuia'n MSL season hmasa pahniha a champion pui TBL lakah minute 18 a khelh tling a, league round lamah a khelh mumal loh avangin atan a awlsam lo.
Joseph Allen erawh a hnawksak takzet, basket nei hnem fal tak ni lo mah se ṭum 26 ngawt rebound a lak theih avangin a ṭangkai hle. Coach Lalruatfela'n ṭangkai lehzual zawka hman dan a ngaihtuah chhuah theih a rinawm.