Tsitsipas leh Medvedev an tlang

Miami Open khelh laiah champion tura rinkai ni phak Stefanos Tsitsipas leh Daniil Medvedev te chuan an khingpui ve ve paltlangin third round an inhlangkai a, seeded pariatna Hubert Hurkacz pawh a tlang.

Nimin zing inkhelah Medvedev hian Roberto Carballes Baena 6-1, 6-2 in a hneh, chak tur hian darkar khat leh minute hnih chiah hun a hmang, season kal laiah Russian tlangval hi match 25 chak tling thei hmasa ber a ni.

Inkhel dangah Hurkacz chuan match point vawi nga ngawt a inchhanhim hnuin Thanasi Kokkinakis chu 6-7 (10/12), 7-6 (9/7), 7-6 (8/6) in a hneh. An inkhelh hun chhung hi darkar thum leh minute 31 niin, tun season ATP hnuaia best of three match rei ber a ni hial.

Stefanos Tsitsipas a vannei, Greek tlangval hi Richard Gasquet nena inkhel tur an ni a, mahse a khingpui tur Gasquet hi hun tepter tawh takah a kerek hliam vangin a inhnukdawk, inkhelh hah ngai loin a tlang.

Grand Slam final vawi hnih lut tawh Tsitsipas hi Indian Wells-ah khan hneh nei loin a tla, atan chuan Miami Open hi insiamṭhat theihna hun a ni, tukinah hian Cristian Garin nen an inhmachhawn dawn a ni.