CAPTAIN Mbappe = 2 GOALS; France = 4 Goals, Netherlands = 0

France captain atana ruat thar Kylian Mbappe-a'n captain armband hreng chungin ram tan goal hnih a khung nghal a, team ṭha Netherlands lakah France chu 4-0 in hnehna a chanpui.

Les Bleus tan captain-a ruat a nih loh avanga lungawi lo anga sawi Antoine Griezmann chuan goal hmahruai a khung a, Dayot Upamecano chuan goal khat a thawh ve bawk.

Netherlands tan Memphis Depay chuan injury time-ah penalty hmanga si phurh sutna remchang nei mah se, goal-ah a chantir thei lo a, khualmualah Netherlands an mualpho.

Euro 2024 qualifier, group B-a awm France hian zanin dar 12:15-ah Republic of Ireland an lenchilh zui dawn a, Netherlands hian zanin dar 12:15-ah vek Gibraltar an mikhual thung ang.

Les Bleus buaina

France tan captain Hugo Lloris-a'n inkhelh a chawlhsan a, coach Didier Deschamps-a'n captain atan tu nge a ruat ang, tih mipuiin an thlir mek laiin kum 24 mi Mbappe a thlang a, France tana tawnhriat nei ṭha zawk leh kum 32 mi Griezmann a lungawi lo.

Mahse, inkhelh hmain Mbappe chuan, "Antoine hi a lungawi loh avangin ka titi pui a, a lungawi lohna pawh ka hrethiam a ni. A dinhmunah ding ta ila, a tih ang tho hian ka tih ka rin thu ka sawi. Mahse, kei captain ka nih a, ani vice captain a nih chhung chuan a chungah ka awm ngai lo ang," a ti a, Griezmann chu vice captain ni mah se amah aia thu a neih zawk tur thu a sawi.

Mbappe-a'n Griezmann lungawi loh thu a zep lo a, zah thiam takin a chanchin a sawi zui. Mbappe chuan, "France tana a tawnhriat ang hi kei chuan ka la nei ve lo a, squad pumpuiin kan ngainat, sang taka kan dah a ni. A tawnhriat leh hringnun a thlir dan phurawm tak hi kan chhawr ṭangkai thei lo a nih chuan kan tan chânna a ni ang," a ti.

Griezmann hian kum 2014 khan ram tan match khel ṭanin, Netherlands an hmachhawn hma hian ram tan match 117 khelin goal 42 a khung a, Mbappe hian ram tan kum 2017 khan khel ṭanin, Netherlands hmachhawn hma thlengin match 66 a khel a, goal 36 a khung.

A dam ta!

France inkhelh hmain, an chak dawn em, tih ai chuan Griezmann lungawi lohna leh Mbappe chanchin hian ngaihven a hlawh zawk a, khelmual an luh meuh chuan he France team hian an buaina chu an hnuchhawn tawh tih a lang chhuak nghal.

Inkhel ṭan aṭanga minute hnihna lekah Mbappé chuan ball luhpuina chance nei mah se a tira Netherlands ball ken lai chhuhsaktu, a ṭhianpa Griezmann tana siamsak a thlang a, Atletico Madrid forward hian hmahruaina ni turin goal-ah a chantir - Mbappe lam hawiin a goal khung a lawm zui a, Griezmann a dam ta!

France an hahchawl rei lo. Goal hmahruai an khung aṭanga minute ruk liam hnu lawkah Griezmann chuan freekick a pet a, heta ṭanga ball kal hi buai nuaih karah an goal hnihna ni turin a khung.

Kum 24 mi Upamecano-a'n ram tana goal a khung vawi hnihna a ni a, a lawm thiam hle. Bayern Munich defender hi tlarhnung laiah Liverpool defender Ibrahima Konaté nen an inkawp a, Manchester United defender Raphaël Varane-a'n ram tana inkhelh a chawlhsan avangin France tlarhnungah pawh inthlak danglamna kan hmu a, Netherlands laka an khelh dan aṭanga teh chuan France mipui thla a muang ang.

A hming Mbappe

France-in hma takah goal hnih an khung a, Netherlands an insiamṭhat phah lo. Minute 22-naah Aurélien Tchouaméni siamsak chu tlarhmaa mal tlat Randal Kolo Muani chuan mawi zetin Mbappe tan a kian a, France captain thar hian a captain nih lawm nan goal-ah a chantir.

Les Bleus hian an duhtawk mai lo - minute 88-naah Netherlands defender rual bumin, a goal hnihna chu ṭha zetin a khung a, Paris St-Germain striker hian an ram captain armband hreng tura a ṭhat tawkzia a pholang.

A vawi hnih nana Netherlands enkawl tura lo kir Ronald Koeman-a'n an ram team a enkawl vawi hnihnaa a match hmasa berah a mualpho pui a, Netherlands team dinthar turin ngaihtuahna tam tak a sen a ṭul.

Hetihrual hian Netherlands hian inkhelh hmain Matthijs de Ligt, Sven Botman, forward Cody Gakpo, midfielder Joey Veerman leh goalkeeper Bart Verbruggen te chu damlohna avangin an thawn haw a ngai a, chhuanlam tur

an nei.