MiCA-in mi panga chawimawi

Mizoram Cycling Association (MiCA) chuan March 24, Zirtawpni khan Synod Conference Centre, Aizawlah General Body Meeting vawi hnihna an hmang a, thirsakawr khalh mi panga hnenah chawimawina hlan a ni.

General Body Meeting vawi hnihnaah hian kum 2023-25 atana hruaitu tur thlannaa an nei a, an thlan chhuah tharte chu Dr. Franklin Lalrinngheta (Electric Veng), PC Lalramengmawia (Mission Veng), Lalrinfela (Ramhlun Venglai), Joseph Lalrinawma (Mission Veng), Frederick Malsawmzuala (Leitan) leh David C. Vanlalfakawma (Zemabawk) te an ni. An post chelh tur hi la insiamrem leh tur a ni ang.

MiCA chawimawite chu

1. C. Lalawmpuia, Dawrpui: Aizawl aṭanga thirsakawr ngata Kolkata inkhalh thleng thei a ni. Hemi hnu hian hun bituk chhunga kilometre thui tak, khawvawt leh khawlum hnuaia tlan chhuak thei, BRM 200KM Guwahati, BRM 300KM Kolkata, BRM 400KM Delhi leh BRM 600KM Kolkata a tlan chhuah avanga Mizote zinga Paris aṭanga Super Randonneur title dawng thei hmasaber leh awmchhun.

2. Vanlallawmzuala Varte, Mission Veng: Lailapur aṭanga Simeinasora (Three country Point 665km), Mizoram hmartawp aṭanga Chhimtawp thirsakawr a tlan a, thirsakawr hmanga Zoram dung leh vang fang chhuak a, Tourism tilar a, entawntlak takin hun a hmang ṭhin.

3. Michael Laldinsanga Ralte, Mission Vengthlang: Kum 2014 khan Shillong Downhill-ah hlawhtlinna a lo chang tawh a, kum 2019 khan Himalaya MTB Challenge-ah a tel a, kum 2022 khan Arunachal Moopin Race-ah pakhatna a ni bawk.

4. Mesak Vanlalvena, Sihfa: Tour de Hmuifangah vawi hnih champion tawh a, MTB Mizoram Winter Challenge-ah vawi hnih a champion tawh a, NE Olympics 2022 XC Elite Men's-ah bronze medalist a ni.

5. Vanlalruata, Tuirial: 2022 NE Olympics XC Junior-ah bronze medalist a ni a, Sakawrhmuituai Downhill challenge 2021-ah pahnihna niin Tour de Hmuifang 2022 Junior-ah pahnhna a ni a, 1st Inter School Cycling Competition 2022 High School Category-ah pakhatna a ni.