Bayern Munich coach thar Thomas Tuchel

Bayern Munich chuan Julian Nagelsmann an ban hnuah Inrinni khan Thomas Tuchel an lakluh thu an puang nghal. Kum 49 mi Tuchel hian June 30, 2025 thleng daih contract a ziak.

Bavarians hian DFL-Supercup-ah hnehna an chan tawh bakah inelna lian pathum Champions League, Bundesliga leh DFB Pokal-ah champion beiseina an la nei vek a, hemi a nih avang hian Nagelsmann chunga an thutlukna hian mak tih a hlawh hle.

An ban chhan

Kum 35 mi Nagelsmann an ban chhan ber chu club hotute mit a tlung tawk loh vang a ni ber a, chutihrualin club chhunga awmte ngaihdan pawh a inang kher lo ang.

Club CEO Oliver Kahn chuan, "Kum 2021-a Julian Nagelsmann kan lakluh khan hun rei tak a enkawl theih kan beisei a, hma thlir thui tak kan nei a ni. Tun season-ah erawh kan hmachhawp leh beisei phak loh chang a tam a, World Cup zawhah kan khelh ṭhat tawk loh bakah kan khel a hmuhnawm nep sawt bawk. Hma thlir thui zawk kan neih avangin thutlukna kan siam ta ni," tiin a sawi.

Bayern sporting director Hasan Salihamidzic pawhin, "Ka thutlukna siam tawh zinga harsa ber a ni. Julian nen hian ni khatna aṭangin kan inkar boruak pawh a ṭha a, kan inkawmngheih hle. Tuna thutlukna siam a ngai ta mai pawh hi pawi ka ti. Amaherawhchu kan team khelh dan uluk takin kan zirchiang a, January hnua kan khelh dan thlirin thutlukna kan siam ta a ni," tiin an result a ṭhat tawk loh thu a sawi.

Bayern hian Lionel Messi, Neymar leh Kylian Mbappe awmna PSG hnehin UCL quarterfinal an lut a, amaherawhchu Bundesliga an thunun lo. Kumin January thla chhung khan league match vawi thumah chak an nei lo a, an khingpui nen an inhnehtawk vek. International break hma khan Bayer Leverkusen an hneh lo a, table-ah pahnihnaah an awm mek bawk.

Mak an ti

Bayern player-te pawhin club thuneitute thutlukna mak an ti. Joshua Kimmich chuan, "Hetiang hi thil kalphung chu a ni a, dawhtheihna leh inhriatthiamna a awm lo. Thutlukna hi kan pawm mai a ṭul ṭhin," tiin a sawi.

Midfield-a Kimmich kawppui Leon Goretzka pawhin, "Thutlukna hian ka chungah nghawng a nei lo ka tih chuan dawt ka sawi tihna a ni ang. Chhungkua ang maiin kan in en a, mak ka ti takzet," tiin a sawi a, Germany coach Hansi Flick pawhin mak a tih thu a sawi ve bawk.

Mizoramah pawh rawn zin tawh Lutz Pfannenstiel chuan, "PSG an hneh zo chauh a, kum nga daih contract a ziak leh tawh a, Bayern-in an ring viauah a ngaih theih. Mahse vawi lehkhatah thutlukna danglam a rawn awm a ni," tiin a sawi a, coach Nagelsmann erawhin club enkawl tur a hmuh vat tur thu a sawi.

Bayern ban tak Nagels-mann hi Tottenham Hotspur nen sawizawm an ni nghal a, Antonio Conte thlak tura hming langsar ber a ni.

Tuchel 'Chona Thar'

Thomas Tuchel pawhin Nagelsmann a tawn ang hi a lo tawng tawh a, German coach hi season ṭantir khan Chelsea manager ni mah se club neitu Todd Boehly nen inhmuhthiam loh vangin an ban.

Tuchel hian ban hial tawk mah se a record duhawm tak hi club lian Bayern Munich tan pawha itawm tham a ni. Blues a zawm hma hian PSG chu UCL-ah final a luhpui a, French club-in an ban hnuah January thlaah Chelsea zawmin UCL-ah a champion pui.

Europe-a London club champion pui tur hian final-ah Manchester City an hneh a, Pep Guardiola hote hi UCL quarterfinal-a Bayern hmachhawn tur an ni. Tuchel chuan, "Bayern enkawl tur chuan inpekna tak tak a ngai a, chak duh club an ni a, chak dan an ngai pawimawh bawk. Squad an nei ṭha a, inelna apiangah champion rinkai an ni pha a, a phurawm hle a ni," tiin a sawi.

Bayern hian April 1, Inrinni zan dar 10:00-ah Borussia Dortmund an hmachhawn dawn a, Tuchel-a'n Bavarians a enkawl hmasak berah a club hlui a hmachhawn dawn a ni.