Morocco-in Brazil an barakhaih

FIFA World Cup-a che ṭha Morocco-in Grand Stade de Tanger, Tangier-ah Brazil an mikhual a, 2-1 in an hneh. Inkhel hi frienldy match ni mah se Walid Regragui hote hneh hi Brazil a nih miau avangin Moroccan mipui lawmna a nep chuang lo.

Pathianni zing inkhelah Morocco-in Sofiane Boufal hmangin hma an hruai a, Brazil-in captain Casemiro hmangin siphurh sut mah se mualneitu tan Abdelhamid Sabiri-a'n chakna goal a khung.

Pele pual

Khawvel player ropui bera mi ṭhahnem takin an ngaih chu nikum December 20 khan cancer natna avangin a thi a, O Rei (The King) ti hiala hming lem an pek Pele hian Brazil hi World Cup-ah vawi thum a champion pui.

Brazil chuan an ram history-a player ropui ber hi an hre reng a, a thih hnua an match hmasa berah player-ten a hming chuanna jersey an ha. Selecao player jersey zawng zawngah jersey number hnuai lamah 'Pele' tih a inziak. Inkhelh hmain Pele hriatreng nan ngawi rengin an ding bawk.

Boruak a ṭang

Brazil leh Morocco inkhel hi friendly match ni mah se boruak erawh a ṭang hle. Ibn Batouta stadium-ah entu 65,000 an pung khawm a, ticket an hralh zo vek.

Morocco hi World Cup-a hming chher Walid Regragui-a'n a la ho a, Brazil erawhin coach Tite aiawh an la lak loh avangin South American U-20 C'ship-a champion puitu coach Ramon Menezes-a'n a ho thung.

Ṭan phat aṭangin inkhel boruak a ṭang a, friendly match ni siin World Cup final ang maiin boruak a ṭang. Morocco lamin tackle rorum tak tak an nei a, mikhual team-in referee lakah an lungawi lohna an thlen nasa.

Brazil-in inkhel thun zawk mah se counter attack-ah Morocco an hlauhawm. Palmeiras winger Rony-a'n ram tana a khelh hmasak berah goal chance ṭha nei mah se hnai tak aṭangin a pet over. Hemi hnu hian Rony hian chance ṭha a hlah leh a, Vini Jr pawhin a khung thei bik lo.

Real Madrid forward Vini Jr hian Morocco keeper Bono tihsual zarah goal khung mah se VAR hmanga ennawn hnuah offside vangin pawm a ni lo. Morocco erawhin an chance ṭha an hlah ve lo a, Bilal El Khannous ball pek chu Sofiane Boufal-a'n minute 29-naah ṭha zetin a khung.

Morocco hian Hakimi Ziyech hmangin chance hnih dang an nei a, Chelsea winger hian a hlah ve ve. Second half-ah Brazil-in siphurh an sut a, minute 67-naah Casemiro ball pet satliah chu Bono-a'n a bawh ṭhelh a, 1-1 a ni.

Inkhel a nung chhunzawm a, minute 79-naah substitute Abdelhamid Sabiri-a'n box chhung aṭangin kawh zetin Morocco chakna goal a khung. Palmeiras goalkeeper Weverton dem theih a ni lo.

Mak ang reng tak erawh Morocco-ah Liverpool keeper Alisson chu squad-ah a awm lo a, Man City keeper Ederson pawh bench-ah a awm bawk.

A ropui e

Friendly match ni mah se Morocco tan Brazil hneh a ropui a, Africa ram zingah Cameroon tih loa Brazil hneh thei hmasa ber an ni. Chutihrualin Cameroon hian Brazil hi ṭum hnih an hneh tawh thung.

Tun hnaia Morocco result hi a ropui hrim hrim. Regragui hote hian FIFA ranking-a number 1 Brazil an hneh hma hian Belgium (FIFA ranking-a 2-na), Canada (41-na), Spain (7-na) leh Portugal (9-na) te an hneh a ni.

Walid Regragui chuan, "Ramadan laiin Brazil kan hneh a, a ropui kan ti takzet," tiin a sawi. Morocco hi Muslim ram a ni a, an hunpui Ramadan an hman mek avangin khaw en laiin chaw an nghei.