Lukaku-a'n Belgium tan hattrick a siam

Romelu Lukaku chuan ram tan innghahna tlak a la ni reng tih pholangin, hattrick a siam a, Sweden lakah an Belgium chu 3-0 in hnehna a chanpui.

Inter Milan striker Lukaku hian minute 35-naah a lu hmanga goal hmahruai khung ṭanin, minute 49-naah hnai set sawt aṭangin a belhchhah a, minute 82-naah a tawp a khar zui.

Kum 29 mi Lukaku hian ram tan match 105 khelin, goal 71 ngawt a khung ta a, mahse, Sweden laka a goal khung hi kum 2021 hnua ram tana a goal khung leh hmasak ber a ni - coach thar Domenico Tedesco tan a match hmasa ber a ni bawk a, result lawmawm bik a ni.

Hetihlai hian kum 41, thla nga leh ni 21 mi Zlatan Ibrahimovic chu minute 73-naah Sweden tan bench aṭanga luhtir a ni a, fans hoin ding chungin an lawm - kum 1983-a Italian goalkeeper Dino Zoff hnua Euro qualifier-a inlan upa ber angin tarlan ni mah se a dik tawk lo.

Group B inkhela Greece-in 3-0 a an hneh tak Gibraltar tan striker Lee Casciaro a inlan a, an ram club Lincoln Red Imps tana khel Casciaro hi Ibra aiin ni liin a upa zawk a ni.

Sweden hian zanin dar 12:15-ah Azerbaijan an mikhual zui dawn a, Belgium hian Thawhlehni zan dar 12:15-ah Germany chu friendly match an khelhpui thung ang.