Spain tana goal hnih khungtu Joselu

Luis de la Fuente enkawlna hnuaia an match hmasa berah Spain chuan 3-0 in Norway an hneh a, La Roja tana a match hmasa berah Joselu chuan goal hnih a khung nghal bawk - ani bakah hian Dani Olmo chuan goal khat a thawh ve bawk a ni.

Spain tan Dani Olmo hian minute 13-na lekah goal hmahruai a khung a, minute 81-naa bench aṭanga luhtir Joselu chuan khelmualah minute hnih chiah hun a hmang hman tihin a khung nghal a, minute 85-naah a belhchhah bawk.

Kum 32 mi Joselu hi kum 2006 hnua Spain tana a match hmasa ber khel thei upa ber a ni a, Espanyol striker tan zan chhinchhiah tlak a ni - tun season-ah a club tan inelna hrang hrangah match 27 khela goal 13 khungin assist vawi li a nei a, a phu ang ngeia ram tana inlan tura koh a nih hnuah goal a khung zui.

Joselu hian Premier League lamah pawh Stoke City leh Newcastle United tana lo khel tawhin, English club pahnih tan inelna hrang hrangah match 79 khel mah se goal 11 chiah a khungsak.

Kum 2019 khan Spain-ah kirin Alaves tan a khel a, season hmasa khan match 38-a goal 14 khungin, tun season-ah Espanyol a pan a, a chet ṭhat chhunzawm - tunah chuan Spain tan hial goal a khung ta.

Spain hi tun hnaiah an insiamrem mek. World Cup 2022 last 16-ah Morocco-in penalty hmanga an petchhuah avangin coach Luis Enrique a bang a, age level hrang hranga Spain lo enkawl tawhtu Fuente lalutin, ani enkawlna hnuaia an match hmasa berah an chak nghal.

La Roja hian Euro 2024 qualifier match hnihnaah Thawhlehni zan dar 12:15 hian Scotland an lenchilh zui dawn. Group A inkhel dangah Scotland hian 3-0 in Cyprus an hneh a, Scott McTominay chuan goal hnih khungin, John McGinn chuan goal khat a thawh bawk - Cyprus defender Nicholas Ioannou chu hun pek belhah hnawhchhuah niin, Scotland-in mikhual team lakah harsatna an tawk lo.