A ṭha pahnih inkhelah Nuggets an chak

NBA champion tura rinkai pahnih Denver Nuggets leh Milwaukee Bucks te nimin zing khan an intawng, inkhel hmuhnawm takah Nuggets chuan 129-106 in Bucks hi an hneh - NBA champion beiseina a sang zual ang.

Denver hi Western Conference hmahruaitu niin, an thiampuipa Nikola Jokic hi a zawna NBA Most Valuable Player ni lai a ni a, hnehna an chan theih nan hian point 31 a neih bakah assist vawi 11 a nei bawk.

Eastern Conference hmahruaitu Bucks hi Giannis Antetokounmpo hoa inlan an ni thung. Kum 2019 leh 2020 MVP hian point 31 a nei ve tho a, mahse hnehna chan nan a tawk zo lo - Giannis leh Jokic te hi tun season MVP tura buk rit an ni.

Jokic khelhna Nuggets hian NBA title an la hlawh chhuak ngai lo, kumin hian a vawi khat nan champion an tum. Serbian star chuan, "Hnehna chan hi thil hlu a ni, a pawimawh erawh playoff china ṭha taka khelh zel a ni ang," a ti.

Inkhel dangah Golden State Warriors chu point 11 zeta an hnufual hnuah an tho chhuak a, an khingpui Philadelphia 76ers chu 120-112 in an hneh. Warriors hi Western Conference table-ah parukna niin playoff atan an dinhmun a ṭha.

Sacramento Kings chuan Utah Jazz 121-113 in an hneh a, tun hnai kum 17 chhunga a vawi khat nan playoff an khel ngei dawn niin a lang ta - a sang zual pariat zinga tel tlang chiang turin Kings hian vawi khat chak an la mamawh.