Fullkrug-a'n Germany a chakpui

Euro 2024 thlengtu tur Germany-in Inrinni zan khan Peru nen Mewa Arena, Mainz-ah friendly match an khel a, Niclas Fullkurg-a goal hnih hmangin 2-0 in an chak.

Hansi Flick-a hoten FIFA World Cup-ah group stage an paltlang thei lo a, insiamṭhat an tum mek. Peru laka bul ṭantu zingah Joshua Kimmich chiah Bayern Munich player a ni a, Manuel Neuer a awm loh avangin captain armband a hreng thung.

Peru-in goal zawnah vawi khatmah an pet loh avangin Marc-André ter Stegen-a'n hna a nei lo a, Germany tlarhnung a phui ṭha. Borussia Dortmund right back Marius Wolf-a'n a vawi khat nan ram tan a khel a, Fullkrug-a goal hnihna a siamsak.

Kum 30 mi Fullkrug hi nikum World Cup hma khan Germany tan a inlan ve chauh a, Timo Werner inhliam vangin Qatar-ah khelhna hun a nei. Tunah erawh ram tan vawi nga chauh a la khel chungin goal nga a khung a, Flick-a tan koh loh a rem tawh lo.

Fullkrug hian goal hnih a khung bakah penalty a hlawh chhuak a, Chelsea forward Kai Havertz-a'n a khung lo. Bayern forward Serge Gnabry pawh goal hmaah a vannei lo a, hnai tak aṭangin crossbar a pet per bawk. Germany hian March 28, Thawhleni zan dar 12:15 hian Belgium an mikhual ang.