BCCI-in Vivo an hnawl

IPL Governing Council Member Mamon Majumdar chuan nimin tlai khan BCCI-in IPL main sponsor Vivo an hnawl thu Vanglaini a hrilh.

Covid-19 vangin kumina khelh tur Indian Premier League chu ruahman hunah a khelh theih lo a, September 19 leh November 10 inkar hian UAE-a khawpui pathum Dubai, Sharjah leh Abu Dhabi-ah khelh a ni dawn.

IPL Governing Council hian ruahmanna hmasaah hun chep tawh avangin sponsor ngai vek an hman tur thu an sawi. BCCI leh Vivo hian kum 2017 khan kum nga chung atan inremna an ziak a, Chinese company hian IPL sponsor nan hian Rs 2,199 crores an seng.

Amaherawhchu India leh China inkar buaina avangin BCCI pawhin Chinese brand Vivo hi sponsor atan a hmang ngam ta lo. Cricket Association of Mizoram honorary secretary Mamon Majumdar chuan, "Main sponsor atan Vivo hmang turin thutlukna siam hman mah ila pressure a nasat avangin thutlukna kan thlak leh ta zawk. Sponsor tur hi advertisement kan chhuah ang," tiin Vanglaini a hrilh.

CAM secretary Mamon hi IPL chungchang ngaihtuahtu IPL Governing Council-ah a tel pha a ni.