Inter tan Alexis Sanchez a khel dawn Zanin dar 12:30-ah Inter Vs Getafe

Europa League khel tur squad-ah Inter Milan-in Alexis Sanchez an ziaklut a, Italian club hian Chilean forward hi Manchester United aṭangin a nghetin an lalut thei dawn niin a lang.

Serie A khelh zawh takah Inter hian point 83 hmuin champion Juventus chu point khat chauhin an pha lo. Nerazzurri hian 2010-11 season-a pahnihna an nih hnua a sang pathuma an awm lehna hmasa ber an ni a, Antonio Conte hote hi team ṭha tak an ni.

Zanin dar 12:30 hian Gelsenkirchen-ah Inter leh Getafe te an inhmachhawn dawn a, single leg a nih dawn avangin penalty shootout thlengin a beisei theih ang.

Inter Milan-in Antonio Conte hnuaiah hma an sawn zel dawn niin a lang a, chutihrualin thlirna dang a awm thei bawk. Conte hi Nerazzurri enkawltu ni lo thei dinhmunah a ding. Serie A-a pahnihna an nih zawh chiah khan Conte chuan, "Ka hnathawh min hriatpui tawk lo a, club aṭangin thlawpna ka dawng ṭha tawk lo. President nena thu ngaihtuah tur a awm a, ani lah China-ah a awm daih bawk si," tiin lungawi lohna a neih thu a sawi.

Italy lamah chuan Conte hi Juventus nen sawi zawm a ni a, a thlakna tur hian Juventus manager hlui Max Allegri an sawi ri der tawh. Chutihrualin thu belhchhian dawl bera ngaih theih erawh Conte leh club president Steven Zhang te hi phone hmangin an inbia a, Italian manager hmalam hun hi Europa League zawhah ngaihtuah a ni chauh dawn. 

Conte chuan, "Inter nen hian kum thum atan inremna kan nei a, hlawhtlinna chang turin theihtawp ka chhuah ang. Juventus nen inbiakna kan nei lo," tiin a pha thung.

Manchester United-in Alexis Sanchez hralh dan an zawng a, Inter Milan-in a nghetin an lalut hnai. Italian club hian Alexis hi a ngheta an lalut duh lo a nih chuan English club-in Europa League khelh zel an remti dawn lo.

Alexis Sanchez hian Old Trafford a zawm hma kha khan kar khata £3,50,000 hlawh tura sawmna a hnar a, English club-ah hian kar khatah £4,00,000 vel a hlawha ngaih a ni. Nimin lama thu thar berah chuan United hian Sanchez hi a thlawna chhuahtir an remti a, Inter hian Sanchez hian season khatah euro maktaduai 7 a hlawh dawn. 

English club hian Chilean forward hi a thlawna an chhuahtir hian a hlawh an pek a ngaih tawh dawn loh avangin euro maktaduai 60 an la hlep pha. Ole Gunnar Solskjaer-a'n Sanchez hi chhawr a tum chuang loh avangin United tan chhuahtir hrim hrim hi a ṭha ber a, Inter Milan hian Romelu Lukaku leh Ashley Young te an lalut tawh bawk.

Inter-in tlarhmaah Lautaro Martinez leh Romelu Lukaku te an inkawp tir thei a, an tlarhma hi an chhuanawm tham hle. Transfer boruak avangin Sanchez-a'n en bik a hlawh dawn.

Spanish club Getafe hian Italian club hrim hrim an la hmachhawn lo a, Inter Milan nen hian an vawi khat intawnna tur a ni. La Liga club hian Jaime Mata leh Angel te an kawl a, Spanish forward pahnih hian tun season-ah goal 14 ve ve an khung tawh avangin Inter Milan tan ngaih ṭha taka awm a thiang lo.