Hmelhriat tamna Basaksehir Man United hmachhawn châk Clichy

Robinho, Gael Clichy, Demba Ba, Martin Skrtel, Mehmet Topal leh Gokhan Inler te hi European football-ah an mikhual lo hle. Heng player-te hi tun season-a Istanbul Basaksehir player-te an ni a, Turkish football-a club lian pathum Fenerbahce, Galatasaray leh Besiktas te rorelna ti tawpin Super Lig-ah an champion.

Europa League-ah Basak-sehir hian round of 16 lutin first leg-ah Copenhagen chu an mualah Edin Visca penalty hmangin an hneh. Zanin dar 10:35 hian Parken Stadium-ah mualneitu Copenhagen an hmachhawn ang.

Istanbul Basaksehir hian Copenhagen an paltlang thei a nih chuan quarterfinal-ah Manchester United an hmachhawn dawn. Arsenal leh Manchester City defender hlui Gael Clichy chuan English club a hmachhawn châk thu a sawi.

Kum 35 mi Clichy chuan, "Zep tur a awm lo, England hi ka ngaina hle. Manchester United hmachhawn hi a châkawm takzet a, English club hi kan hmachhawn thei a nih chuan ka tan a hlu khawp ang. Chutihrualin United ngaihtuah thei kan la ni lo a, Copenhagen lakah rilru pek phawt a ngai," tiin United a hmachhawn châk thu a sawi.

Turkish club-te inelna sang ber hi kum 1959 aṭanga ṭan kha a ni a; Galaltasaray (22), Fernerbahce (19) leh Besiktas (15) te an chungnung fal a, Trabzonspor (6) leh Bursaspor (1) te an champion ve tawh bawk.

Istanbul Basaksehir hian tun hmain league nomawi an la chawi ngai lo a, 2017 leh 2019 khan pahnihna an ni. Tun season-ah bul an ṭan ṭha lo a, match hmasa pahnih chak lo mah se league match 34-ah point 69 hmuin an champion. Gael Clichy chuan, "Nomawi kan chawi hi hlawhtlinna ropui tak a ni a, kan vannei tel bawk," tiin a sawi a, chutihrualin an player neih dan thlirin champion turin an ṭha ve hrim hrim bawk. Europa League-ah pawh Roma leh Borussia Monchengladbach te nen group khatah awm mah se group hmahruaitu ni thei an ni a, round of 16 lut turin Sporting Lisbon chu khualmualah 3-1 a an hneh loh hnuin an mualah 4-1 in an lehthal.

Liverpool-in tun season-a Premier League nomawi an chawi hma hian 2013-14 season khan nomawi chawi turin an dinhmun a ṭha hle. Amaherawhchu captain Steven Gerrard a tawlh thlu a, Chelsea striker Demba Ba-a'n goal a khung. 

Reds ṭantute ṭahna thlentu Ba kha Basaksehir striker a ni a, Senegalese striker goal khung tur hnai taka entu Martin Skrtel pawh kha Turkish club-ah hian a khel. Hei chauh hi a ni lo, a hun laia khawvel player langsar ni pha Robinho pawh a la tel - Brazilian forward hi kum 36 mi a ni tawh.

Gael Clichy chuan, "Clichy inkhel man chawiin in en peih lo ang, a chhan chu thil danglam ka tih loh vang a ni. Robinho erawh a danglam a, mi danglam bik a nih avangin zah pawh a phu. Kum 10 liam taa a tih theih ang kha a ti thei tawh lo a, chuti chung chuan Brazilian footballer ball thiam tak kha a la ni reng," tiin Robinho chungchang a sawi a, Basaksehir inkhel en châkawm sawt.