Conte-a'n lawmthu a sawi - tuin nge thlak dawn?

Tottenham Hotspur nena inṭhen hlim Antonio Conte chuan London club ṭantute hnenah lawmthu a sawi a, "Kan zinkawng zawh ho chu a lo tawp ta a, duhsakna sang ber ka hlan che u a ni," tiin social media kaltlangin thlahna thu a sawi.

Kum 53 mi coach hian Southampton nen an inhnehtawk hnu lawkah khan Spurs player-te chu mahni hmasial tiin a sawisel a, club chairman Daniel Levy thlengin a sawisel a, a chhuah ngei hi rin dan sa a ni - thla 16 chiah a enkawl hman.

Conte chuan, "Football hi chu thinlung thlenga fan chhuaktu thil a ni a, Spurs-a ka ngaihtuahna leh phurna min ṭawmpui a, coach ka nihna anga ka thathona min thlawptute chungah lawmthu ka sawi a ni. Engtiklai pawha min thlawp a, min duhsaktu fan-te ka hre reng a, ka hming lama an zaite kha ka theihnghilh ngai lo ang," a ti.

Italian coach Conte assistant Cristian Stellini chuan Spurs hi season tawp thleng a enkawl dawn a, London club hi tuin nge a nghetin engkawl chhunzawm ang, tih chu zawhna a awm mek - Conte-a'n Spurs-ah season khat chhungin pound maktaduai 15 a hlawh niin an sawi a, coach langsar lakluhna tur pawisa an neih avangin hming lam rik zingah hraw tak tak an awm nual.

Luis Enrique

Kum 52 mi Enrique hi khawvela coach langsar pawl ni phak a ni a, Spain a chhuahsan hnuah team enkawl a nei lo a, Tottenham-a kal a pawi ti lo nia sawi thawm a awm - Barca a enkawl lai, 2014-17 inkarah khan Champions League nomawi chawipuiin, La Liga (2), Copa del Rey (3), UEFA Super Cup, FIFA Club World Cup leh Spanish Super Cup-ah te a champion pui bawk.

Thomas Frank

Brentford coach hi coach langsar ni lo mah se a hnathawh erawh a ṭha hle. Bees (Brentford sawina) hi an club chanchina a vawi khat nan Premier League a hruai thleng a, a season hmasa berah 13-na nihpuiin, tun season-ah pariatna an ni mek - kum 48 mi coach hi budget tlemah pawh hnathawh a thiam tih chu hriat sa a ni a, club lian enkawl a thiam ang em, tih erawh zawhna awm thei tak a ni.

Oliver Glasner

Eintracht Frankfurt boss hi hriat hlawh tawk lo mah se a hnathawh erawh a ropui hle - season hmasa khan kum 1980 hnua a vawi khat nan Frankfurt chu European final a luhpui a, Europa League nomawi a chawipui zui. Kum 48 mi coach hian Austrian club LASK-ah pawh hna ṭha tak thawkin, VfL Wolfsburg chu Champions League a lo khelhpui tawh bawk. Kum 2024-ah a contract a hmang zo dawn a, Spurs nena sawizawm an ni hi a awm lo hran lo.

Ryan Mason

Kum 31 mi Mason hi Spurs player hlui niin, Hull City tana a khelh laiin a luruh khi vangin inkhelh a chawlhsan a, coaching a luhchilh nghal - kum 2021-a Jose Mourinho ban a nih khan Spurs a lo enkawl lailawk tawh a, Conte hnuaiah coaching staff zingah telin, manager lailawk Stellini hnuaiah assistant coach hna a chelh ang.

Julian Nagelsmann

Kum 35 mi German coach hi Bayern Munich-in an ban hlim a ni a, Spurs nen sawizawm nghal a ni. 1899 Hoffenheim leh RB Leipzig-a a hnathawh ṭhat sawi nawn a ngai lo a, Bayern pawh season hmasa khan Bundesliga nomawi chawipuiin, German Super Cup-ah vawi hnih a champion pui bawk. Tun season league-ah pawh point khat chiahin Borussia Dortmund an phak lo mek a, Champions League quarterfinal-ah Bayern hruai thlengin, match riat an khelhah an chak vek a, an hneh zingah Barcelona, Inter Milan leh Paris St-Germain an tel.

Mauricio Pochettino

Kum 50 mi Poch hian 2014-19 kha Spurs lo enkawl tawhin, fan-te ngainat a la ni reng - Premier League 2016-17 ah khan pahnihna nihpuiin, kum hnih hnuah Champions League final lut bawk mah se Liverpool an ngam lo a, a vanduaina chu pahnihna ten nomawi an chawi ngai lo hi a ni. Southampton pawh enkawl tawh coach hian Spurs a chhuahsan hnuah PSG enkawlin league leh French Cup-ah nomawi a chawipui a, nikum nipui khan Paris club a chhuahsan.

Marco Silva

Fulham boss hi kum 45 chauh ni mah se coaching khawvelah tawnhriat a nei ṭha tawh hle. Sporting Lisbon chu Taca de Portugal-ah champion pui tawhin, Olympiakos pawh league-ah a champion pui tawh a, Hull City, Watford leh Everton a enkawl tawh bawk. Cottagers (Fulham sawina) hi May, 2022 khan Premier League khel turin a kaipui a, table-ah pakuana an ni mek.

Cristian Stellini

Kum 48 mi coach hian season tawp thleng Spurs a enkawl dawn a, Champions League a inpetkaipui a nih ngat chuan rawih chhunzawm a ni lo ang, tih a sawi theih loh. Conte hnuaiah Spurs assistant manager niin, Juventus leh Inter Milan-ah Conte hi a lo thawhpui tawh bawk.

Roberto de Zerbi

Brighton & Hove Albion boss hian Graham Potter-a'n Chelsea a chhuahsan khan Brighton a zawm a, league-ah pasarihna ni mekin, season thara European football khelh beiseina an neih a sang hle. July thla khan Ukraine indona avangin a club enkawl lai Shakhtar Donetsk a chhuahsan a, Amex Stadium-ah hian kum li atan contract a nei mek.

Zinedine Zidane

Kum 50 mi coach hi player ropui ber pawl a ni a, coach ropui zinga chhiar tel theih a ni ṭan der tawh bawk. Real Madrid chu Champions League-ah vawi thum champion puiin, league-ah vawi hnih a champion pui bawk. Club nei loa awm mek coach hian Spurs a zawm chuan player langsar tak takin London club pan an hreh lo ang a, chhuak tur anga sawi thawm awm mek Harry Kane pawh a chelh thei hial mai thei.