Paragliding training nei dawn

India ram pum huapin Mizoramah vawiin aṭanga April 18 chhungin paragliding training neih a ni dawn. Training hi Champhaiah neih tur niin, state 12 aṭangin training tur mi 45 an rawn tel a, tualchhung mi 10 an tel dawn bawk.

Paragliding training neih tur chungchangah nimin khan Aizawl Press Club-ah Mizoram Aero-Sports Association (MASA) chuan chanchinbu mite an kawm. Champhaiah hian theory leh practical training an nei dawn a, hetah hian pilot proficiency (P1-3) an zir ang a, P-5&6 chu tuipui chungahte zir a nih dawn avangin state dangah training hi chhunzawm a ni ang.

MASA hi kum 2010 November 23 khan din a ni a, pawl ṭhangduang tak niin kum 2011 khan International paragliding festival chu Serchhipah thlengin hetah hian Nepal leh Sweden aṭangin mi 47 an rawn thlawk a ni. Kum 2018 khan pre-world cup chu Serchhipah thleng lehin ram hrang hrang 9 aṭangin mi 75 an zir chhuak bawk.

Tun ṭuma training hi Mizoram mai ni lo, India rama mumal taka training bautsaih tur a ni a; National Aero_Sports policy 2030 tihhlawhtlinna tura ruahman a ni. Training course zote hi International Paragliding licence pek an ni dawn a, khawi hmunah pawh thlawkin paragliding competition-ah pawh an tel thei tawh dawn a ni.