Hero Super Cup atan Aizawl FC an inpuahchah
2023 Hero Super Cup chu April thla hian khelh a ni dawn a, Indian Super League leh I League club-te an inhmachhawn dawn. Super Cup hi a vawi thumna tur a ni dawn a, tun ṭum inelna hi Kerala-in a thleng dawn a, Kozhikode leh Manjeri-ah khelh a ni ang.
Mizo club Aizawl FC pawhin inpuahchahna an ṭan tawh a, I League zawh hnuah hun rei lote chawlin, March 21, Thawhlehni aṭang khan Mizo coach Victor Lalbiakmawia kaihhruaina hnuaiah training an ṭan. Super Cup-ah hian ISL club an tel dawn avangin Mizo player-te tan an theihna pholanna hun ṭha tak a ni ang.
Inelna kalphung
ISL club 11-in group stage an khel nghal dawn a, I League aṭangin champion RoundGlass Punjab pawhin group stage aṭangin an ṭan ang. Tun ṭum inelnaah hian I League aṭanga relegate Mumbai Kenkre leh Sudeva Delhi te an tel pha lo.
I League-a pakuana Rajasthan United leh 10-na Neroca ten first qualifying round an khel dawn a, I league club pahnihna aṭanga pariatna ten second qualifying round an lut nghal. Aizawl FC pawhin pasarihnaah season an khar a, second qualifying round aṭangin an khel ṭan ang.
Mizo club ve thung
Aizawl FC-in I League-ah Caetano Pinho hoin an khel a, Super Cup-ah erawh Victor Lalbiakmawia'n a ho thung dawn. Mizo club coach Victor-a chuan, "ISL club-te nen inkhelh theih dan a awm a, player-te tan an theihna pholan theihna hun ṭha a awm avangin kan phur tlang hle," tiin Vanglaini a hrilh.
Mizo club hian qualifying round-ah Trau an hmachhawn dawn a, Manipur club hi an hneh a nih chuan ISL club Hyderabad, Odisha leh East Bengal te nen group khatah an awm ang.
Aizawl FC-in result ṭha neih duhin an foreigner pawh an chelh a, an striker pawimawh Henry Kisekka erawh a fanu a chetsual avangin an ram Uganda-ah a haw. Belarusian forward Ivan Veras pawh damloh vangin training a la zawm thei lo. Player pawimawh damlo hi club tan chânna a nih rualin Mizo player tan hming chher theihna hun a ni thei bawk.
Engtin zel?
Super Cup hi kum 2018 aṭang khan khelh ṭan a ni a, Bengaluru FC chuan final-ah East Bengal 4-1 a hnehin an champion. Kum 2019 khan FC Goa-in Chennayin FC 2-1 a hnehin an champion ve bawk.
Hemi hnu hian Covid-19 vangin inelna hi neih theih a ni lo a, tun ṭum hi Covid-19 hnua neih leh hmasak ber tur a ni ang.