Mizo nulate an tlawm

Senior Women's National Football Championship khelh meka an match hmasa berah Mizo nulate an tlawm nghal a, team ṭha Maharashtra chu 5-1 ngawtin nimin khan an ngam lo.

IGIS Complex, Haldwani, Uttarakhand-a inkhelah Maharashtra hian minute 14-na aṭanga goal khung ṭanin, Sapna Rajpure, Arya More leh Bhumika Mane ten first half chhungin goal khat ṭheuh an khung a, chawlhlawkah 3-0 a ni.

Second half-ah Mizoram beiseina siam turin Deborah Lalenpuii chuan si phurh a rawn sut ṭhen a, mahse, Sanika Patil leh Bhumika Mane ten goal khat ve ve rawn khung lehin, Mizo nulate hi 5-1 in an tlawm.

Senior Women's National Football Championship-ah hian team 31 awmin group rukah ṭhen hran an ni a; group tin hi hmun hran ṭheuhah khelh niin, group tina hmahruaitu leh pahnihna ti ṭha zual panga te chuan final round an lut ang a, hetah hian directe entry-a lut Railways-in an lo zawm ve leh ang - final round-ah team paruk ve ve awmin, group hnihah ṭhen an ni leh ang a, an inkhelh kual hnua group pahniha a sang pahnihte chuan semifinal an lut dawn a ni.

Inelna hnuhnung berah khan Mizoram hian semi final an lut a, tun ṭumah hian player thar deuh vek thlan niin an ruh a la no deuh tih an result-ah a lang.