France a zawnin an chak - hmabak a êng

Kylian Mbappe captain-na hnuaiah France an chak leh ta a, Thawhṭanni zan khan Euro qualifier-ah Republic of Ireland chu 1-0 in an hneh - Les Bleus tana goal awmchhun hi Benjamin Pavard-a khung a ni a, mualneitu Ireland lamin a chhanletna tur an nei lo.

Euro qualifier-ah chuan group B hi awm châkawm lohna pawl a ni. France bakah hian Netherlands, Greece leh Ireland an awm a, Gibraltar tih loh chu European football-a team ṭha pangngai tak vek an ni.

Mahse, France-in khawvela team ṭha ber pawl an la ni reng tih pholan chhunzawmin, qualifier-a an match hmasa pahnihah team ṭha Netherlands leh Ireland an hneh nghal a, nakkumah Euro an khelh ngei a rinawm.

Euro 2024 qualifier hi nizan khan khelh chhunzawm a ni a, zanin aṭangin match dang erawh a awm tawh lo ang - international football hnuchhawnin, tualchhung league ngaihnawm lam a hawi theih leh ṭan dawn e.

Mbappe beiseina

Karim Benzema meuh pawh mamawh loa inngai France-in Mbappe captain-na hnuaia an match hmasa berah Netherlands chu 4-0 ngawtin an sawp a, Ronald Koeman hnuaia insiamṭhat tum mek team laka an chet dan hian fans tam tak lung a dum hle.

Dutch team lakah hian Mbappe chuan a captain nih lawmin goal hnih a khung a, Ireland lakah pawh Paris St-Germain forward hi mipui mit fukna a ni - mahse, Mbappe lansarh loh zan a ni tlat.

France goal awmchhun hi minute 50-naa Pavard-a khung a ni a, Ireland midfielder Josh Cullen-a ball pass chu Bayern Munich right back Pavard hian laksakin, Southampton keeper Gavin Bazunu dan theih lohin a chhuih lut nghal.

Pavard-a'n goal a khung hian Les Bleus hi harsatna nei loa awlsam taka chak zui mai tura ngaih an ni a, mahse, hun tawp thlenga goal dang khung belh loin, harsa takin an chak hram.

Ireland an vanduai

France-in hnehna chang mah se Ireland vanduai thu tarlan tel a ngai tlat - France-in an chak theih chhana lawmthu hrilh tur an nei a nih chuan goalkeeper Mike Maignan chu fak phu a ni a, AC Milan keeper hi a rintlak hle.

Les Bleus hi an keeper rinrawl leh captain ni bawk Hugo Lloris chuan international football mangṭhain, a ram jersey a hlip a, Tottenham Hotspur keeper awm loh hnuah Maignan chuan first choice dinhmun a luah zui.

Ireland laka a khelh dan en chuan France ṭantu tam tak chuan first choice dinhmun a luah har zawk an ti ngei ang. Milan keeper hian James McClean-a chance neih chu ṭha zetin a dansak a, France defender Jules Kounde-a'n an lama a tihluh tur dansaktu pawh Maignan bawk a ni.

France tana a vawi sarih nana inlan Maignan-a'n hun tawp dawna Wolverhampton Wanderers defender Nathan Collins khung ngei tura ngaih a dan phei chu pui tak a ni - a team a chakpui tiin a sawi ngam a, Ireland lakah chuan Mbappe aiin a langsar zawk.