England leh Arsenal beiseina siamtu Rawlthar duhawm Bukayo Saka

Instagram lama a chanchin tawi a ziahnaah chuan "Isua Naupang" tiin a ziak kalh a, he a thu ziah aṭang hian Bukayo Saka chanchin leh nungchang tur chu thui tak a hriat nghal mai theih - amah ngeiin a chanchin a sawinaah chuan Bible chhiar ṭhin mi a nih thu a lo sawi tawh bawk a ni.

Tun dinhmunah kum 21 mi a ni a, hmabak nei êng tak a ni. Arsenal tan chuan fa chuam duhawm bik a ni a, an ram England tan pawh player ṭha rual zingah tlan bik a ni ṭhin; club leh ram tana beiseina siamsaktu hi English mipuite ngaihzawn rawn a ni mek.

Hello England

Mihring dinhmun a inang lo - Mizoram chhungah ngei pawh khawpui leh thingtlang dinhmun a inthlau viau. Khawvel ram zau zawk kan thlir a nih pawhin khawsak phung a inang lo thei viau, a bik takin Africa khawmualpuia chengte an la rethei hle.

A nu leh pa Adenike leh Yomi Saka te hi Nigerian mi a ni a, an ram a retheih em avangin khawsak nawm ve deuhna beiseiin England ramah an pem. Ealing, Greater London-ah Saka hi a piang, a thisen chu Nigerian lam mi ni mah se English mi a ni nghal.

Naupang lehkha thiam thei pangngai tak a ni a, mahse a rualpui dangte ang bawka football tuichilh mi a ni. A hming 'Bukayo' tih hi West Africa lama ṭawng chi khat Yoruba aṭanga lak a ni a, a awmzia chu 'Hlimna a Belhchhah' tihna a ni.

England tana a khelhpui Ben Chilwell chuan, "Football aṭanga ka mi hriat zingah chuan mi ṭha berte zinga mi a ni. Training neihna hmunah te hian midang a ti hlim thei hle a, midang lakah hlim hmel a pu thei reng emaw tih mai tur a ni hial.

"Khelmual chhungah pawh mahni hmasial loin midang goal khung tur siamsak nuam ti chi a ni a, amah maia ti loin midang a ṭanpui a, chuan hnehna min chanpui ṭhin," tiin Saka a fak a, a hming an phuah chhan a pu zo hle.

Hale End

A naupan zual deuh lai chuan Watford tan pawh a lo khel tawh. Chumi hnuah Arsene Wenger hoa an buatsaih Arsenal training-na hmun Hale End a pan, he tih lai hian kum sarih mi chauh a la ni - North London club tan hian khelh phak tumin a inzir chhunzawm ta a ni.

Arsenal U16 coach Trevor Bumstead chuan, "Bukayo hi rualkhat zinga ṭha bik a ni. Thutluk­na a siam thiam em em a, ball pass hun a hriain khingpuite bum tuma chet hun pawh a hria, a kum ngaihtuahin a taksa a chakin a rilru put hmang a dik bawk," tiin a naupan lai a lo sawi tawh.

Naupang thuawih nih ringawt kha a tawk lo a, khawvel hriat ni tur chuan inkhelh thiam a ngai bawk. Kum 17 a tlin khan Arsenal chuan contract an ziahpui nghal a, under 23 team lamah an ziak lut chhunzawm nghal bawk a ni.

Arsenal chhungkua a chhum hmin a ni bawka Thierry Henry ngaisangtu a ni a, a inzir laia Arsenal forward pawimawh Alexis Sánchez khelh dan chuan a rilru a hneh ṭhin hle bawk, mual sir lama ball thunun leh ken luh danah Sanchez khelh dan hi a zir nasa.

Defender David Luiz khan Saka hi nasa takin a lo fuih ṭhin, Brazil international hlui hian training-na leh khelmual chhungah Saka a fuih nasa a, chuvangin English forward hian tun dinhmun a thlen theihna chhan zingah Luiz hi a dah pawimawh hle bawk.

Par a chhuang

Unai Emery-a'n Bukayo Saka hi Arsenal team tana inlanna remchang a siamak hmasa ber, 2028 November 29 khan Europa League-ah substitute bench aṭangin a lut a, a hnu lamah chuan a khat tawkin Gunners tan a inlan chhunzawm reng.

Emery thlaktu Mikel Arteta a rawn lan chinah phei chuan Saka hian mawhphurhna lian lehzual zawk a la, a tikimtu mai ni loin khelmual chhunga a mawhphurhna lian latu a ni a, kum 20 mi lek a nih lai aṭangin boruak sang a zo tawh hle.

A tawi zawng chuan Saka hmasawnna hi a zuan in a zuang a ni ber, a naupan deuh laia a theihna san zia hmutu tan erawh chuan thil mak erawh a ni hran lo. Tun hnaiah club leh ram tan match hnuhnung 34 aṭangin goal 23 a thawk chhuak.

Striker a ni lo a, goal khung ṭeuh ṭeuh tura beisei chi a ni lo. Goal 23 a thawh chhuah zingah hian goal 16 khungin a ṭhiante khung tur vawi sarih a siamsak thung. Premier League bikah tun season chhungin goal 12 khungin assist ṭum 10 a nei tling tawh bawk a ni.

England midfielder hlui Paul Merson chuan, "Bukayo Saka hi chu club chhe deuh laka hattrick siam pup pup ang chi kha a ni lo, chiang taka chakna inkhela goal khung hnem ang pawh a ni lo. Arsenal tan goal hmahruai leh si phurh sutna goal emaw, chakna goal emaw khung chi a ni," a ti.

England fa chuam

Euro 2020 khel turin Gareth Southgate-a'n a ko a, mi tam tak chuan England training boruak tem ve tura koh niah an ngai a, inelna hmachhawn tur tak tak zingah a tel an ring lo, mahse a tel ta si. Final squad a chhuah hnuah pawh a khelh phak an la ring hlawm lo.

Mahse, ṭha takin Euro a khel a, final-a penalty a hlah vang erawh chuan diriamna a tawk nasa hle. Amaherawhchu, mi sawiselna vanga hnungtawlh mai mai tur a ni lo. Euro bakah hian Qatar-a World Cup thlengin player ṭha rual zinga thlan bik a ni ta zel.

Euro 2024 khel turin England an inbuatsaih a, coach Southgate-a'n a chungah rinna a nghat chhunzawm. Italy an hneh ṭumin inkhel bul ṭantu zingah a tel leh chat a, Ukraine-a lakah pawh a danglam chuang lo - goal a khung bakah Harry Kane goal tur a siamsak zui.

Ukraine tlarhnung an fimkhur a, minute 37 chhung chu ṭha takin an inveng thei. Mahse, Saka hian Kane tana khung turin ball a vawrh luh hnu lawkah, amah vengtu Vitalii Mykolenko tlan bumin box pawn aṭangin goal mawi bik a khung.

Hliam leh harsatna dangin a tlak buak a nih ngawt loh chuan Southgate-a'n a ring chhunzawm dawn tih a chiang a, nakkum maia khelh tur Euro 2024 hi England tana vanglai hun a hmanna a ni thei dawn niin a lang.

Bukayo Saka hi goal hmaah a hriam ta hle, inrintawknain a khat. Ka thusawi fiahna chu club leh ram tana khelh danah a lang. Mual sir lam aṭanga kan mamawh ang goal leh assist rawn thawk chhuak thei player chu a ni a, chu chu tun season kal mekah kan hmu ṭhin bawk.

Hlawhtlinna chan chakin a tuihal em em a, a mihring mihrinna hian kawng dikah a hruai. Nitin mai hian hmasawn a duh a, hetiang rilru hi pu reng thei se ka duh khawp mai, tun hnaia a hmasawnna hian min ti lawm tazket.

Club leh ram tana a khelh pawhin, player tawnhriat nei ṭha zawkte thlawpna dawng ṭha em em a, hei hi player naupang zawk tan chuan a pawimawh hle. Tunah hian eng ang taka sangah nge ka dah ka sawi rih lo ang, a chhan chu hmasawn zel turin ka duh a, nuamti takin inkhel zel phawt rawh se."
- Gareth Southgate, England Manager

Zan tina Bible chhiar ṭhintu

Kristian chhunga aṭanga seilian a ni a, atan chuan Bible chu nunna chaw lakna hnar ber a ni. Bukayo Saka chuan zantin Bible a chhiar ṭhin tih a sawi a, football inelna ropui leh hlu bik World Cup an khelhnaah pawh kha Bible hi a keng thlap.

Saka chuan, "Zantin Bible ka chhiar ziah, ka tan chuan Pathian hi a pawimawh em em a, inrintawkna min petu leh ka hnung lama min zui rengtu a ni bawk, a ruahmanna te hi ka ringhlel loin a hunah tak zel a lo lang ṭhin.

"Khelmual chhungah pawh Pathianin min awmpui reng tih hre chungin ka lut ṭhin. Pathian ringtu ka nih avangin hlauh tur a awm lo a, lungngaihna tur pawh a awm lo, thil thleng thei tam tak karah pawh eng pawh tawk ila Ani nen chuan buaina tur a awm lo," a ti.

Saka hian social media lama thlalak a tarlan hoah pawh Pathian thu a hmang nasa. "Pathian chu ka chakna a ni" tih leh "Hnehna kan chang leh ta, goal ka khung bawk. Pathian hi chu a ropui a ni," tih a ziahte chu media lam chaw tui a tling.