Tuchel hnuaiah Bayern an training

FC Bayern Munich chuan manager thar Thomas Tuchel hoin nimin khan an training-na hmun Sabener Strasse-ah training an ṭan a, Bavarians hian tunkar tawp hian Bundesliga hmahruaitu Borussia Dortmund an mikhual dawn.

Bayern hian international break laiin coach Julian Nagelsmann an ban a, Chelsea manager hlui Thomas Tuchel an lalut. Nagelsmann an ban thu hian Bavarians player-te ngei pawh a ṭhawng hle.

Germany international midfielder Joshua Kimmich chuan, "Nomawi pathum chu la chawi thei vak mah ila kan chak tam tawk loh avangin an ban. Bundesliga-ah kan che ṭha tawk lo a, match hnuhnung 10 aṭangin match ngaah chauh kan chak. Kan result hi duhthusam ni lo mah se dressing room-ah team a la thunun hneh hle," tiin a sawi.

Kimmich hian Pep Guardiola, Carlo Ancelotti, Niko Kovac leh Hansi Flick te a hrawn tawh avangin dressing room thunun thei leh thei lo manager hre hrang tawh tur a ni. Bayern midfielder Kimmich chuan, "Coach thlak ṭum hi ka tawng fo tawh a, tun ṭumah hian chuan team chhungah lungawi lohna a awm lo. Mak kan ti tlang," tiin club hotute thutlukna chungchang a sawi.

Bayern player zingah Nagelsmann duhtu an la ṭhathnem avangin Tuchel-a tan hna a awlsam dawn lo a, Borussia Dortmund an hmachhawn nghal dawn avangin hna a harsa lehzual ang.

Tuchel hnuaia training hmasa berah hian striker rinrawl Eric Maxim Choupo-Moting bakah player pawimawh Thomas Muller leh Leroy Sane te pawh an tel a ni.