Mizoram Super League champion Khatla TBL
Khatla TBL chuan Zarkawt BCA hnehin Mizoram Super League season 8 nomawi an chawi. Tualchhung basketball inelna sang berah TBL hi vawi thum an champion tling ta, season nga liam hnuah an champion lehna hmasa ber a nih avangin a hlu zual.
Thawhlehni zan MSL Finals Game 2 inkhelah TBL hian 81-73 in hnehna an chang a, best of three series khelh tur chu 2-0 in an la a, game hnuhnung ber khelh ngai loin an tlang nghal - Zarkawt BCA chuan season li chhung an kawl tawh nomawi an hloh thung.
R. Dengṭhuama Indoor Stadium, Mualpuiah basketball ngainatu an pungkhawm hnem, stadium chhunga lut leng lo pawh a pawn lamah an awm ṭeuh, mi zawng zawng tan ticket pek theih a ni si lo - Mizoram Basketball Association hruaitu lamin hrehawm an tih thu an sawi hial.
Boruak ti dai nuam tawk chauhin ruah a tla zauh a, hei hian boruak ti nuam viau mah se inkhel boruak erawh a ti dai chuang lo, hamrik hmasa ber aṭanga a tawp thlengin a nung vet vet hle, tawnhriat nei ṭha lo tana buaina tham a tling.
A hmuhnawm
Khatla TBL coach Vanlal-nunsanga'n inkhel bul ṭan turin - Vanlalṭhazuala, K. Lalthianghlima, Joshua Keys, Lalliansanga leh Eddie Zaithanmawia te a rawn chhawp chhuak, game 1-1 bul ṭantu Michael Lalliansanga aiah Thianga a rawn lut.
Zarkawt BCA lamin thil an ti danglam lo, coach Lalruatfela'n a player rin pangngai panga Zonunsanga, Joseph Allen, Matthew Remtluanga Sailo, Lalrina Renthlei leh Reuben Lalsangkima te bawk bul a ṭan nawn tir.
Champion lai Zarkawt BCA lamin basket neih tumin an bei hmasa, mahse an hlawhtling lo. Team pahnih an inveng uluk zual, league round lamah chuan match khatah point 100 chuang nei ṭhin mah se final boruak erawh a danglam.
An inthlah fal duh lo a, point nga aia tamin an inkalsan ngai meuh lo. Chawlhlawk an hman lai pawhin Khatla TBL hian 47-45 in hma an hruai a, an intlau lo takzet - second half tir lamah Khatla bawkin point an nei hmasa.
Mahse, Lalrina Renthlei chuan 3-points rawn vawm lutin 51-51 a ni ta chiah. TBL thiampuipa Joshua Keys-a'n Tuikhuahtlang tlangval hi basket khat leh free thow pakhat hmangin a rawn umzui nghal a, a team chu dinhmun ṭha zawkah a dah.
A boruak
Quarter pali khelh tur zinga pathumna an khel a, a boruak a sang chhunzawm. Zarkawt BCA tan Reuben Lalsangkima'n mawi zetin a lay-up lut dawn emaw a ti hman a, mahse Keys bawk rawn inrawlh hmanin chiang zetin a block a, point hnihin TBL (56-54) an sang hret.
Zarkawt BCA an hnufual reng duh bik lo. Joseph Lalrinawma 3-points hmangin an lehthal thut a, an intlauhna point hnih chauh a nih avangin basket khat lekah an dinhmun a inthlak, Lalrina'n 2-points nei zuiin BCA hian point 60 an tlin hmasa.
BCA lamin 61-62 a hma hruai chungin quarter thumna an khar a, an hmahruaina an hum tlang a nih chuan finals game 3 khelh a ngai ang. Mahse, TBL lamin thil tum dang an lo nei, quarter hnuhnung ber tirah Emmanuel VL Awmpuia hmangin an lehthal nghal pawp.
K. Lalthianghlima'n point a rawn nei zui a, Zarkawt lamin nawr let an tum luatah ball an hloh. Most Valuable Player atana thlan tak Joshua Keys chuan chiang lutukin a 'Dunk' pawp a, American player hian Lalrina'n 3-points a neih tur a block sak zui.
Khatla TBL tan a hmanhmawh thlak tawh lo, point nga chuangin hma an hruai fal thei deuh reng tawh a, a tawp lam minute ngaah chuan champion tur a chiang tia sawi ngam a ni tawh, hmahruaitu ṭum kua ngawt inthlakna inkhelah TBL an ding chang ta zawk.
Coach Lana a lungawi
Khatla TBL champion puitu coach Vanlalnunsanga hi tualchhung baksketball ngaina tute lakah chuan a mikhual lo. Khatla TBL player hlui a ni satliah lo - MSL season hmasa pahnihah khan an veng team hi a champion pui.
Inkhelh a chawlhsan hnuah team enkawl hna a thawk zui a, tunah chuan Khatla TBL tan lawmna a siam leh ta. Lana chuan, "Kan tum angin kan khel thei a, kan ruahmanna hrang hrang a hlawhtlin theih avangin ka lawm takzet.
"Zarkawt BCA inkhel kha vawi 10 chuang kan ennawn a, an hlauhawmna leh ṭhat tawk lohna lai kan hre chiang hle. Tualchhung player inbeihna a ni a, kan naute ṭhatna lai kan hriat fuh bakah BCA player dan dan tur kan hre thei bawk.
"Season hmasa khan game 1-ah kan chak a, a hnu pahnihah kan chak lo. BCA coach Afela khan an khelh dan ngai a la rawn hmang a, keini chuan chumi lo hneh let dan chu kan ngaihtuah chhuak," tiin Vanglaini a hrilh.
Kan lo kir leh ang
- BCA coach
A zawna vawi li an champion hnuah Zarkawt BCA-in an nomawi an hloh a, tun season Mizoram Super League-ah an tum ram thleng ta chiah lo mah se coach Lalruatfela chuan season tharah ṭha taka an lo kir leh tur thu Vanglaini a hrilh.
BCA coach Afela chuan, "Season dangah chuan kan khingpuite chet fuh theih loh karah pawh basket kan nei leh zauh zauh ṭhin, kumin chu a ni ta tlat lo. Kan luh ngei tura ngaih kan hlah nasa a, a tawpah kan tuar ta a ni.
"Eng inelna pawh ni se chak loh hi chu a nain a hrehawm, chuvangin insiamṭhat kan ngaihna lai kan zawng ang. Ṭhat tawk lohna leh siamrem ngai lai kan nei, chumi chu siamṭhain tun aia ṭha zawk hian MSL-ah lo kir leh kan tum," a ti.
BCA coach chian MSL buatsaihtute chungah lawmthu a sawi a, tualchhung baketball chawisan nana Mizoram Basketball Association hmalakna a fak bawk. Afela hian season tharah Lalrina Renthlei, Matthew Sailo leh Zonuna te a la nei dawn, MSL kir leh hun hi nghahhlehawm hle.
MVP Keys:
MSL8 MVP atana thlan Joshua Keys hian final-ah minute 40 khelh tur awm aṭangin minute 39 leh second 38 a khel a, Khatla TBL champion nan player pawimawh a ni. Keys hian point 34 a neih bakah rebounds 10 a nei a, block panga a neihte chu a pawimawh hle. Inkhelh banah pawh Keys hian a phu angin lawm a hlawh hle.
Mipui an ṭhahnem:
MSL8 final-ah R. Dengṭhuama Hall leng lo mipui an pungkhawm a, MBBA leh Zonet buatsaih basketball inelna hlawhtlinna lantirtu chu mipuite hi an ni.
A tawp ta ... :
Zarkawt BCA-in Mizo player ṭha Lalrina Renthlei, Zonuna leh Matthew te an kawl a, MSL-ah a zawnin vawi li an champion. MSL8-ah Mizo player ṭha bakah Joseph Allen te nen a vawi nga nan champion tum mah se an tlin ta bik lo. Khatla TBL lakah BCA record duhawm chu a tawp ta.
Eddie-a a hlu:
Khatla TBL-in Mission Veng Hotshots aṭangin an fapa rangkachak Eddie Zaithanmawia an lalet a, inelna ṭan hmaa an thutlukna fuhzia chu final-ah a lang. Khatla tlangval Eddie hi Zarkawt tlangval Matthew leh a ṭhianten an chelh lo.