Hero Tri-Nation-ah India an thiam ber

All India Football Federation (AIFF) buatsaiha neih Hero Tri-Nation International Football Tournament chu Thawhlehni zan khan khelh zawh a ni ta a, India chuan match hnuhnung berah Kyrgyz Republic chu 2-0 a hnehin champion nomawi an chawi.

Blue Tigers tan hian Sandesh Jhingan chuan goal hmahruai a khung a, captain Sunil Chhetri chuan minute 83-naah penalty hmangin a belhchhah bawk - hun tawp thlengin goal dang a lut lo a, India an chak.

Imphal, Manipur-a inelna neihah hian India chuan match hmasa zawkah Myanmar chu 1-0 in an lo hneh tawh bawk a, match hnih an khelhah hnehna an chan ve ve avangin ram pathum zingah India aia chungnung zawk an awm lo.

ISL khelh zawh taka Hero of the League Lallianzuala Chhangte chuan match hnihah hian India tan bul a ṭan ve ve a, Lunglei tlangval hi player of the tournament-ah thlan zui a ni.

Chak tum India

India-in 1-0 a Myanmar an hneh hnuah ṭhenawm ram hi Kyrgyzstan nen 1-1 in an inhnehtawk leh a, Blue Tigers tan Tri-Nation series-a nomawi hawn turin match tawp bera draw result hlawhchhuah a tawk.

Heti chung hian India-in goal khung tumin formation an rem a, 4-3-3 in an rawn intlar - Gurpreet Singh Sandhu-a'n rin lawk ang ngeiin si ban a nghak a, a hmaah Pritam Kotal, Sandesh Jhingan, Anwar Ali leh Akash Mishra te an ding thung.

Midfield-ah Jeakson Singh, Suresh Singh Wangjam leh Anirudh Thapa inkawpin, Myanmar laka bul ṭan Lianzuala leh Sunil Chhetri ten bul an ṭan nawn a, Brandon Fernandes hmuh tur a awm ta bawk.

Khuman Lampak Stadium-a mipui 30,000 chuang hmaah India-in goal khung tumin mikhual team an nawr nghal a, mahse, Myanmar laka chance chhawr thei lo Sunil Chhetri bawk a vanduai a, Brandon-a'n freekick hmanga a chance neih a chhawr lohte pawh uiawm a tling.

A tawpah India

Fans puihna nena phur tak India hian minute 34-naah erawh goal an khung ta tho tho a, Brandon-a freekick aṭanga ball kal chu centre back Sandesh Jhingan chuan training-naa an zir sa ni awm mawiin, ṭha zetin goal-ah a lo chantir.

Goal dang hmu tur erawhin India-in an nghah hret a ngai a, minute 84-naah Manipur tlangval Naorem Mahesh Singh an tihtluk avangin Kyrgyzstan-in penalty an chawi.

India tan captain Sunil Chhetri a lo pen chhuak a, harsatna nei loin goal-ah a chantir. Mikhual Kyrgyzstan tan tho leh turin hun a tam tawk tawh lo a, goal dang lut loin Blue Tigers hi 2-0 in an chak zui.

Hero Tri-Nation series-ah India an champion a, kuminah hmabak a la awm - June-ah Intercontinental Cup an khel ang a, SAFF Men’s Championship chu June 20 - July 3 inkar hian Bangladesh-ah khelh a ni dawn bawk a, mahse, India hian September-a neih tur Asian Games inbuatsaih nan Under 23 team an tir dawn nia sawi a ni.