Lianzuala hming a mawi leh ta

Mizo tlangval Lallianzuala Chhangte chu Hero Tri-Nation series, India squad-a Mizo player awmchhun a ni a, ISL Golden Ball kawltu hi chawimawinain a umzui zel - player of the tournament atan thlan a ni.

Lunglei tlangval hi match hnihah bul a ṭan ve ve a, Myanmar leh Kyrgyz Republic tan a hnawksak ṭhin takzet - Myanmar leh Kyrgyz Republic laka Sunil Chhetri tana a chance duhawm siamsak, goal-a chantir a ni lote kha uiawm a tling.

Lianzuala chuan, "Game hnih chauh kan khelh avangin player of the tournament an siam tih pawh ka lo hre chiah lo a, ka beisei loh lam a ni. Ka thiltih ṭhat ve chhun min lo hmuhsak niah ka ngai a, Pathian malsawmna a ni," tiin Vanglaini a hrilh.

Mumbai City forward chuan inkhel thlirletin, "Ground a ṭha tawk lo a, an duh angin ball an keng rei thei dawn lo tih hre chungin a tir aṭangin kan nawr nghal a, kan tifuh ni berin ka hria. A tir aṭanga a tawp thlengin kan ṭang mar pat a, chu chuan min pui bawk," a ti.

Leitlangpui tlangval Lianzuala hian India tan match 19 ngawt a khel tling ta a, goal li a khungsak tawh bawk - Lianzuala hian chawlh pawh nei loin, Mumbai City squad a zawm lehnghal ang.

Mumbai hian April 4-ah Jamshedpur FC nen AFC Champions League khel tur zawngin playoff an khel dawn - JFC hi season hmasa ISL league round winner niin, Mumbai hi tun season-a league round winner an ni thung.

Dan pangngai ang chu ni se, team pahnih hi Champions League khel tura tling an ni. Mahse, AFC-in Champions League kalphung a thlak danglam a, CL hnuhnung ber chu April 2022 - May, 2023 inkara khelh niin, season tharah chuan September, 2023 - May 2024 inkarah khelh a ni dawn.

Jamshedpur hian hei vang hian league winner an nih khan Champions League an khel hman lo a, tun season league winner Mumbai nen hmun ruak an inchuh a ṭul ta a ni.

Mumbai hian Champions League playoff zawhah Hero Super Cup an khel zui leh dawn a, Super Cup hi April thla chhungin khelh zawh hman tur a ni ang.