Ronaldo leh Messi kiangah Chhetri

India tan captain Sunil Chhetri-a'n goal a khung leh ta a, Bengaluru striker hian Blue Tigers tana goal 85 a khungna chiah a ni - ram tana goal khung tam lamah Hungary legend Ferenc Puskás (84 goals) a tlanpel.

Chhetri hian international football-a goal khung tam lamah chuan Cristiano Ronaldo (122), Ali Daei (109), Lionel Messi (102) leh Malaysia legend Mokhtar Dahari (89) te chiah a phak tawh lo.

AIFF Player of the Year-a ṭum sarih zet thlan lo ni tawh Chhetri hi kum 38 mi a ni tawh a, India tan rei tak a khel tawh lo ang tih a chiang - Ronaldo leh Messi te an la inkhelh ve reng avangin a khum a rinawm chiah lo a, Bayern Munich striker hlui Daei pawh khum a harsa mai thei a, Dahari erawh khum theih niin a lang.

Kum 1976-a World Soccer magazine-in Asian striker ṭha bera a thlan Dahari hian Malaysia tan goal 89 khung turin match142 a mamawh a, Chhetri hian goal li chauha phak loin, ram tan match kuain a khel tlem zawk bawk.

Ronaldo leh Messi lo lan hmaa, rei tak chhung international football-a goal khung hnem ber ni reng Ali Daei-a'n ram tan match 148-ah goal 109 a khung a, Chhetri-a'n Daei aiin ram tan match 15-in a khel tlem a, goal 24 ngawtin a la phak lo bawk.

Chhetri-a'n ram tana goal a khung hnem ber kum chu kum 2011 kha niin, match 17-ah goal 13 a khung a, kum khata goal riat khung hi vawi hnih neiin, 2008 khan match 13-ah goal riat a khung a, kum 2021 khan match 10-ah goal riat a khung.

Indian striker hian kum hnih dang a khelh leh chuan kum 40 a tling tawh dawn a, rinrawla la neih reng a har tawh mai thei - hetih chhunga goal 24 khung hi thilmak danglam a thleng a nih loh chuan a harsain a rinawm.

Nakkum January - February hian 2023 AFC Asian Cup chu Qatar-ah khelh a ni dawn a, India pawh an inlan dawn. Asian football-a ram leh ram inelna sang ber khelh zawhah hian Chhetri hian ram tana inkhelh a chawlhsan a nih pawhin a mak lo ang.