Ram tana goal thawk chhuak hnem ber Messi

Lionel Messi chuan Argentina tan Curacao lakah hattrick a siam a, assist vawi khat a nei bawk. Ram tan match 156 a khelh aṭangin goal 174 a thawk chhuak ta a, khawvelah mahni ram tana goal thawk chhuak hnem ber a ni.

Nimin zing friendly match inkhelah Messi-a'n goal thum a khung bakah Nicolas Gonzalez, Enzo Fernandez, Gonzalo Montiel leh Anfel di Maria ten goal khat ṭheuh an khung bawk a, mipui 42,000 hmaah nuamsa takin hnehna an chang.

Argentina hian FIFA World Cup an chawi hnuah match hnih an khelh lehna a ni a, hnehna an chang ve ve. Kar hmasa khan Panama chu 2-0 in an lo hneh tawh bawk a, coach Lionel Scaloni kaihhruaina hnuaiah result an nei ṭha tluang hle.

Messi hian a goal hmasa ber khung turin a ball hmuh hmasak chu a siamrem nghal a, chiang zetin a khung. Goal hnihna chu Messi goal khung thiam dan pangngai, box sir lam aṭanga goal kila thlawh luh ang bawk kha a ni.

Argentina tana hattrick siam tur hian chak takin ball a tlanpui a, minute 37 an khelh chuan hattrick a siam fel der tawh - mimal chawimawina ngaihhlut ber Ballon d'Or vawi sarih dawng tawh hian club leh ram tan vawi 57 hattrick a siam tling ta chiah bawk.

Kum 35 mi Messi hian Argentina tan goal 102 a khung ta a, an ram tana goal khung hnem lamah amah hnaih bertu Gabriel Batistuta (65 goals) nen an inthlau rem rem hle a, striker ṭha Sergioa Aguero chuan goal 41 a khung bawk a ni.

Ram tana goal khung hnem lamah Messi hi pathumna a ni mek, a chungah Cristiano Ronaldo (122) leh Ali Daei (109) te an awm, goal thawh chhuah tam lamah erawh Ronaldo leh Ali Daei te chungah Messi hi a awm thung.