Euro 2024 Qualifier ; Goal khung tam ber Rasmus Hojlund

European Championship khel tur zawnna Euro 2024 Qualifier thawh khatna chu zawh a ni a, thawh hnihna hi June thla laihawlah neih leh tur a ni. Match hnih khelh tawh aṭanga goal khung tam ber chu Rasmus Hojlund a ni a, Denmark striker hi chhinchhiah a ṭha ang.

Kum 20 mi Hojlund hi Atalanta tan a khel mek a, Denmark tan kum bithliah inelna hrang hrangah khel tawhin ram tana inkhel bul a ṭan hmasak berah hattrick a siam nghal. Kazakhstan lakah pawh inkhel bul ṭanin Hojlund-a'n goal hnih a khung leh bawk.

Finland laka hattrick a siam ṭum hian Hojlund-a'n goal khung thei bik a ni tih a pholang a, goal hmasa ber khung tur hian dinglam aṭanga ball cross chu zuang lut chungin a pet lut. Danish striker hian thiam taka ball a veh avangin amah vengtu Iceland defender a bum chiang hle.

Goal hnihnaah pawh Hojlund hian ball a zawng tih a lantir a, hun chep takah rang takin a tauh hman. Hattrick siamna goal-ah pawh a theihna sanzia a lang zel a, defender ball dan per chu la thlain goal-ah a pet thei nghal.

Kazakhstan lakah Denmark chesual mah se Hojlund erawhin hming a chher tho. Hojlund hian tlarhnung aṭanga ball vawrhluh satliah anga lang chu a chakna hmangin goal chance ṭha bikah a insiam a, goalkeeper chiah a hmachhawn hnuah awlsam hmel takin a pet khum. Goal hnihna erawh a ke zawnah a tla fuh a, chiang takin a pet goal.

Hojlund hian Serie A-ah pawh goal sarih a khung tawh tho avangin vannei satliah a ni lo niin a lang. Atalanta hian euro maktaduai 17-in Sturm Graz aṭangin nikum August khan an lalut a, man to zawka hralh an hreh lo ang.

Euro 2024 Qualifier-ah hian Europe ramte chu group 10-ah ṭhen darh an ni a, group tin aṭangin a sang pahnih an tling nghal dawn. Inelnaah hian team 24 an tel dawn a, a thlengtu Germany chu tling sa an ni a, hmun ruak dang pathum hi playoff hmanga zawn tur a ni.