Spain an la insiamṭha lo - an tlawm!
World Cup round of 16-a an tlak hnuah coach Luis Enrique-a'n mawhphurhna lain banna a thehlut a, coach thar Luis de la Fuente lalut zuiin beiseina an nei sang hle - an match hmasa berah Norway chu 3-0 in an sawp.
Mahse, Spain hlim chhung chu chhum rei lotê lo lang a, ral leh ang mai a ni a, Thawhlehni zan khan Euro 2024 qualifier-ah Scotland chu 2-0 in an ngam lo.
Scotland goal hnih hi Scott McTominay a khung ve ve a ni a, Scottish team hian an match hmasa zawkah Cyprus an lo hneh tawh bawk avangin Euro 2024 khelh beiseina an nei sang sawt - an group-a team huphurhawm ber Spain an hneh thei tlat!
Beiseina
Scotland-in Euro 2020 kha khel ve mah se group stage aṭangin an tla a, World Cup an khelh hnuhnun ber lah kum 1998 kha a ni tawh - hei vang hian Euro 2024 khelh ngei an duh a, an duhna chu thiltihin an lantir.
Hampden Park-a fans 47,000 chuang hmaah Scotland an phur a, goal khung turin an nghah rei a ngai lo. Inkhel ṭan aṭanga minute sarihna lekah McTominay a inlar nghal - Tottenham Hotspur full back Pedro Porro chuan ball a ken laiin a tawlhthlu a, hei hi Andy Robertson chuan a laksak.
Liverpool full back hian rem taka lo awm McTominay tan a siamsak a, United midfielder hian Chelsea goalkeeper Kepa Arrizabalaga tana dan rual lohin goal-ah a chantir.
A vawi hnihna
Scotland-in an duhtawk mai lo. Minute 51-naah Arsenal tana hmun chang phak meuh lo Kieran Tierney chuan ṭha zetin ball a tlan luhpui a, a ball cross chu Spain defender David Garcia chuan lo dang per mah se a per lehlam chu ṭha taka tlan lut McTominay chuan goal-ah a chantir - ram tana goal nga a khungna chiah a ni.
Hun tawp thlengin goal dang a lut lo a, Scotland-in November 1984 hnua a vawi khat nan Spain an hneh - Scottish team hian goal tam zawk khung thei an ni a, mahse, Lyndon Dykes chuan keeper chauh a hmachhawn chungin a ti goal lo a, John McGinn chuan freekick aṭangin bar a pet per bawk.
Norway laka goal hnih khungtu Joseulu chu Scotland tlarhnung tana player hnawksak a ni a, mahse, ani pawh hian cross bar a tih per bakah Scottish keeper Angus Gunn a paltlang thei lo.
A tawpah chuan
Spain boss Luis de la Fuente-a'n Scotland a zuam sual a, Norway hmachhawn team aṭangin player pariat ngawt a thlak danglam - qualifier meuh chu inenchhin nana hman chi a ni lo, tih a chiang tawh ang.
La Roja vanneihna erawh an awmna group A-ah team langsar tia chhal tur an awm lem lo. Scotland bakah Norway, Georgia leh Cyprus chu an group-a awm an ni a, Fuente-a tan insiamrem theih a ni.
Hetihrual hian Spain hian June 15-ah Nations League semifinal an khel zui dawn a, an hmachhawn tur hi Italy an nih avangin top level-a tawnhriat la nei tam lo coach Fuente tan ngaihtuahna sen thar a ṭul.