Liverpool-in Milner an la dawr lo

Jurgen Klopp-a'n James Milner chhawr zel a châk thu sawi mah se Liverpool club hotuten English player hi contract chungchangah an la dawr lo.

Tun season tawp hian Milner-a contract hi a tawp dawn a, Klopp chuan kum khat dang cham se a duh. January thla khan Milner hi kum 37 a tling a, a kum ngaihtuah chuan upa deuh tawh mah se a tawnhriat ṭha tak leh position hrang hranga a khelh theihna hi team tana ṭangkai a ni.

Milner hian tun thlenga contract a la pawhsei loh avangin tun nipuiah hian Roberto Firmino hnung zuiin Anfield chhuahsan thei dinhmunah a ding.

Kum 37 mi Milner hian kum 2015 khan Manchester City aṭangin free transfer-in Liverpool hi a zawm a, Reds tan hian match 321 a khel tawh. Leeds United aṭanga lar chhuak Milner hi Premier League-a goal khung naupang ber pawh a lo ni tawh a, English football-a inelna sang berah hian match 608 a khel tling tawh a ni.