Germany ngam loh De Bruyne

Euro 2024 thlengtu tur Germany-in RheinEnergieStadion, Cologne-ah Belgium an mikhual a, Manchester City midfielder Kevin de Bruyne ngam loin 3-2 in an tlawm.

Red Devils-in Yannick Carrasco leh Romelu Lukaku hmangin an khung hmasa a, Niclas Fullkrug hmangin mualneituin siphurh sut ṭhen mah se De Bruyne hmangin mikhual team-in hma an hruai nawn. Hun tawp dawna Serge Gnabruy goal khung chu scoreline tihmawina chauh a ni.

De Bruyne show

Minute rukna lekah De Bruyne ball fing chu Carrasco-a'n um lutin amah umtu Marius Wolf chu fing takin a bum a, hnai tak aṭangin kawh zetin a pet goal. Minute thum hnuah Lukaku-a'n hnai tak aṭang thoin a khung a, De Bruyne pass tho a ni.

Peru laka clean sheet thei Germany-in minute 10 pawh tling loah Belgium lakah goal thum an chhuah. Germany an vannei a, Fullkrug-a'n Lukaku ban tauh perin penalty an hmu a, German striker Fullkrug hian minute 44-naah goal-ah a chantir zui bawk.

Second half-ah Timo Werner hmangin Germany-in siphurh sutah an inngai a, offside vangin pawm a ni lo. Minute 78-naah KDB-a'n a class pholangin goal ṭha bik a khung a, Germany no. 1 nih tum Marc-André ter Stegen-a'n goal thum ngawt a chhuah phah. Hun tawp dawn hnaiah subsitute Kevin Schade siam chu Gnabry-a'n a khung a, Belgium 3-2 in an chak ta tho.

Engtin zel?

Belgium-in coach thar Domenico Tedesco hnuaiah result ṭha an nei a, friendly match-a Germany an hneh hma hian Sweden 3-0 in an hneh. Red Devils hian match hnih aṭangin goal ruk an khung a, golden generation-a tel player ṭhahnem tak awm tawh lo mah se team ṭha an la ni reng.

Germany erawhin insiamṭhat an la mamawh reng a, Peru lakah 3-0 in chak mah se inkhel a la nung tawk lo. Tun ṭum friendly match pahnihah hian Hansi Flick-a'n Bayern Munich player a ko tam tawk lo a, Belgium an khelh dan thlirin Bavarians innghahna Thomas Muller leh Leroy Sane te paih ngawt a la rem lo niin a lang.