IPL khel tur Stokes-a khup a na

England Test captain Ben Stokes khup hliam a dam chiang lo a, Indian Premier League a khelh a ṭul avangin India a pan hmain a khupah an chiu. Kum 31 mi Stokes hian February thlaa New Zealand an hmachhawn ṭum aṭang khan a khupah harsatna a nei a, hun rei tak a ding thei lo.

Khawvela cricket inelnaa sum tamna ber IPL hi April 31, Zirtawpni aṭangin ṭan a ni dawn a, Stokes-a telna Chennai Super Kings hian champion lai Gujarat Titans an hmachhawn dawn.

CSK hian nikum kum tawp khan Stokes hi nuai 1625-in lilamna aṭangin an chang a, an player pawimawh a ni. Amaherawhchu English all rounder hi a khup a dam chian loh avangin season ṭantirh lamah a vawm tel thei dawn lo a, club tan chânna nasa tak a ni ang.

CSK batting coach Michael Hussey chuan Stoke-a'n a vawm theih hun tur a sawi lo a, season ṭantirh lamah erawh batting-ah a insawrbing tur thu a sawi thung.